“Mbretëria e Bashkuar është mbështetëse e madhe e Pavarësisë së Kosovës”, deklaroi kështu, Ministri i Punëve të Jashtme të Mbretërisë së Bashkuar, David Cameron.
Pas takimit me homologen kosovare, Donika Gërvalla-Schwarz, kryediplomati britanik bëri të ditur se kryesisht kanë diskutuar për sigurinë dhe ekonominë e vendit.
Me ç’rast, Cameron u shpreh bindës që Mbretëria e Bashkuar do të vazhdojë mbështetjen dhe ndihmën e saj në të gjitha mënyrat ndaj popullit të Kosovës.
“Ne duam të vazhdojmë të ndihmojmë. Ne jemi mbështetës të madh të pavarësisë e të sovranitetit të Kosovës. Pra, biseduam për sigurinë dhe ekonominë e vendit. Ne duam të bëjmë ende më shumë për t’iu ndihmuar juve, t’iu ndihmojmë për të siguruar punë për qytetarët e vendit. Unë jam këtu për t’iu mbështetur, për t’iu promovuar dhe për t’iu ndihmuar në të gjitha mënyrat. Këtë mëngjes biseduam për sigurinë tuaj dhe kontributin që në mund të bëjmë në këtë drejtim. Duke përmendur faktin që Britania luan një rol të madh në KFOR, duke përmendur edhe mbështetjen dhe trajnimin që u kemi dhënë edhe forcave të armatosura të Kosovës dhe suksesin e madh që e patën në trajnimin e tyre”, deklaroi Cameron gjatë konferencës së përbashkët me ministren Gërvalla.
Po ashtu, Cameron tha se kanë përmendur edhe punën që Kosova po bën në luftën kundër korrupsionit.
“Biseduam edhe për luftën kundër korrupsionit dhe atë që po bën Kosova për ta vënë në rend ligjin, këto janë fushat ku ne po ndihmojmë. Mendoj që njëra prej gjërave që e dëgjova e që është shumë e rëndësishme, është rëndësia e stabilitetit në Ballkanin Perëndimor në përgjithësi”, potencoi tutje Cameron.
Më tej, Cameron do ta takojë edhe presidenten e vendit, Vjosa Osmanin.
Takimi me Osmanin nis në orën 09:10 në Kabinetin e Presidentes.
Kjo është vizita e parë jashtë vendit në këtë vit për David Cameron. Diplomati arriti në Kosovë të mërkurën ku u takua me kryeministrin, Albin Kurti./teve1.info/.
