Policia e Kosovës ka arrestuar një person në Zubin Potok për “sulm ndaj personit zyrtar” dhe “kontrabandim me mallra”.
Përmes një komunikate, bëhet e ditur se për shkak të rezistencës nga disa persona, Policia në kundërpërgjigje ka shtënë me armë zjarri në drejtim të tyre.
Po ashtu, kanë njoftuar se këta të fundit po kontrabandonin dele nga Serbia.
“Gjatë realizimit të detyrave e aktiviteteve policore, zyrtarë policorë nga Njësia e Ndërhyrjes së Shpejtë e Policisë Kufitare, sot më 30.12.2023 rreth orës 06:15, në fshatin Bube të Zubin Potokut, kanë vënë re lëvizje të dyshimta të disa automjeteve. Në përpjekje për t’i ndaluar dhe kontrolluar automjetet e dyshuara, policia ka hasur në rezistencë të armatosur nga persona të dyshuar. Të ndodhur në një situatë të tillë, për të mbrojtur vetën dhe vënë situatën nën kontroll, zyrtarët policorë i janë kundërpërgjigjur sulmit po ashtu me armë dhe kanë arritur ta arrestojnë njërin nga të dyshuarit: D.I., (viti i lindjes 1981, mashkull serb kosovar nga Z.Potoku). Gjatë shkëmbimit të zjarrit, zyrtarët policorë dhe i arrestuari nuk kanë pësuar lëndime. Gjatë kontrollit të kamionit, janë gjetur të ngarkuara 40 copë dele, pa dokumentacion përcjellës e që dyshohet se janë kontrabanduar nga Serbia për në Republikën e Kosovës”, thuhet në komunikatë.
Njëherit, aty janë hasur edhe dy automjete të braktisura, ku dyshohet se kanë qenë në përcjellje të kamionit.
Kamioni me dele është dërguar në terminalin doganor, dy veturat e hasura në vend-ngjarje janë konfiskuar, kurse më aktvendim nga prokurori, i dyshuari është dërguar në mbajtje deri në 48 orë./teve1.info/.