Te skuadra e Mallorcas po ndihen më të lehtësuar pasi kanë mësuar datën e rikthimit të sulmuesit Vedat Muriqi në fushë. Muriqi nuk do të jetë në dispozicion të trajnerit Javier Aguirre për ndeshjen e parë të vitit 2024, por do të jetë i gatshëm për duelin kundër Celta Vigos. Këtë ndeshje, Mallorca e luan në shtëpi më datën 13 janar. Në fakt, La Liga do të rikthehet në aksion në ditët e para të janarit, ndërsa Mallorca më datën 3 do të jetë mysafire e Real Madridit. Muriqi do ta humbë edhe këtë ndeshje për të qenë plotësisht gati për Celtan në kuadër të xhiros së 20-të në La Liga. E përditshmja “Marca” ka shkruar të martën se Muriqi nuk ka pushuar fare për Krishtlindje pasi është stërvitur i vetëm në palestër. Edhe pse ende nuk ka filluar të vrapojë, Muriqi pritet të jetë plotësisht i gatshëm për lojë në duelin kundër Celtas.
“Rikthimi i Muriqit në fushë ka zgjatur më shumë se që ishte parashikuar, por sulmuesi i Mallorcas do të jetë i gatshëm për ndeshjen kundër Celta Vigos. Kosovari nuk ka qenë në gjendje t’i ndihmojë Mallorcas për më shumë se një muaj, por ai po punon intensivisht për rikuperimin e plotë të tij. Madje, Muriqi edhe ditët e pushimit po i shfrytëzon për t’u stërvitur në palestër, përpara se të fillojë të vrapojë”, ka shkruar gazeta spanjolle. “Ai nuk pritet të rikthehet në duelin e parë të vitit 2024 kundër Real Madridit, por do të jetë gati kundër Celta Vigos, ndeshje që luhet më 13 janar”.
29-vjeçari i ka munguar Mallorcas prej muajit nëntor kur u lëndua duke luajtur për Kosovën kundër Izraelit në ndeshjen kualifikuese për “Euro 2024” të zhvilluar në stadiumin “Fadil Vokrri” në Prishtinë më datën 12-të. Që nga atëherë, Muriqi i ka munguar Mallorcas në gjashtë ndeshjet e fundit kampionale, në të cilat ekipi ka regjistruar dy fitore, tri barazime dhe dy humbje. Aktualisht, Mallorca zë vendin e 14-të në tabelë me 18 pikë të mbledhura pas 18 xhirove të zhvilluara. Reprezentuesi i Kosovës është njëri prej lojtarëve kyç te Mallorca, ndërsa këtë edicion ka shënuar katër gola dhe ka bërë dy asistime në 12 paraqitje kampionale. Te Mallorca po besojnë se me rikthimin e Muriqit, do të rikthehen edhe golat pasi ka shënuar vetëm pesë gola në La Liga prejse sulmuesi është i lënduar. Muriqi ka kontratë me skuadrën spanjolle deri në verën e vitit 2027, ndërsa para Mallorcas ka luajtur edhe te Lazio, Fenerbahçe, Rizespori, Gençelbirligi e Giresunspori. Me fanellën e Kosovës, Muriqi ka regjistruar 51 paraqitje dhe ka realizuar 26 gola.
