Kryetari i Lidhjes Demokratike të Kosovës, Lumir Abdixhiku, ka thënë se në mbi 17 mijë anketa të realizuara deri më tani në regjionin qendër, 35 deri në 42 për qind të qytetarëve kanë deklaruar se do ta votonin LDK-në nëse zgjedhjet do të mbaheshin këtë të diel, raporton teve1.info
Përmes një shkrimi në Facebook, Abdixhiku ka reaguar pas disa sondazheve të publikuara nga Lëvizja Vetëvendosje, sipas së cilës prin kjo parti, pasuar nga PDK.
Abdixhiku tha se VV publikoi sondazh me 800 qytetarë, derisa të njëjtën e quajti “propagandë të lodhur”.
“Tash e dy muaj, Lidhja Demokratike e Kosovës ka porositur një seri sondazhesh, më të mëdhaja në historinë e anketimeve në Kosovë.
Deri më tani, kanë përfunduar mbi 17,000 anketa vetëm në regjionin qendër. Rekord anketimesh këto për të siguruar saktësi të paprecedentë statistikore. Në pyetjen se, nëse zgjedhjet nacionale mbahen këtë të diel, për cilën parti do të votonit, rezultatet për LDK, të marra deri më tani vetëm për 5 qytete në regjionin qendër janë:
Prishtinë 35%
Lipjan 42%
Podujevë 35%
Obiliq 36%
Fushë Kosovë 34%
Anketat, në këtë nivel, po bëhen gjithandej Kosovës, dhe ato do të publikohen me kohë. Do t’i publikojmë vetëm për LDK-në sepse duam të ruajmë korrektësinë ndaj palëve tjera”, ka shkruar ndër të tjera Abdixhiku.
