Limaj, konsideron se Fondi i Sigurisë është hajgare me vendin, sepse sipas tij koha e vullnetarizmit tashmë nuk ekziston.
“Fondi i Sigurisë, për mua është hajgare, është hajgare me vendin, sepse ka shkuar koha e vullnetarizmit, sepse nuk është më “Vendlindja thërret” apo “Fondi i 3 përqindëshit”, sepse ky vend është shtet, prandaj si mund ta mbash ushtrinë me një fond që dikush mund t’i sjellë 5 euro”,tha Limaj.
Ai theksoi se Kosova ka një marrëveshje me NATO-n, ku ka mundësinë që edhe për 10 vitet e ardhshme të sigurojë armë. Por, sipas tij e rëndësishme është që NATO ta ndryshojë marrëveshjen, pasi që edhe zhvillimet kanë ndryshuar.
“A e dini ju që ne kemi një marrëveshje me NATO-n, Kosova ka një marrëveshje me NATO-n edhe për 10 vite të ardhshme të specifikuara për çfarë armatimi mundemi me ble, ju duhet të loboni te NATO për të ndryshuar marrëveshjen, për shkak se zhvillimet kanë ndryshuar, për shkak se vendi demokratik po rrezikohet me luftën Rusi-Ukrainë, prandaj po them që duhet ta shfrytëzojmë këtë moment, sepse kur ne kemi nënshkruar një marrëveshje NATO-Kosovë, ka qenë një situatë tjetër, situata sot është tjetër. Ne duam që Kosovës t’i jepet e drejtë nga NATO të armatoset sikur vendet e rajonit, sepse nuk ka mungesë parash, por nuk kemi drejtë të armatosemi. Sepse nëse ne nuk kemi helikopterë, nuk ndodh se nuk kemi para, por se nuk na lejohet”, shtoi Limaj.
Sipas Limaj, shteti i Kosovës ka potencial deri në 1 miliardë euro për të bërë kontrata armatimi.
“Shteti ka mundësi të pakufizuara, sot shteti i Kosovës ka potencial deri në 1 miliardë euro për të bërë kontrata armatimi, sepse janë kontratat e armatimit dhe ato jepen me vite, këtu nuk është çështja se a ka Kosova potencial për armatim, sepse Kosova ka kufizime të tjera, prandaj po them që loboni në NATO për të ndryshuar marrëveshjen, sepse situata ka ndryshuar”,theksoi Limaj. /teve1.info/
