Është inauguruar objekti i ri i Fakultetit të Edukimit dhe Fakultetit të Filologjisë në Universitetin “Ukshin Hoti” në Prizren. Të pranishëm ishin kryeministri i Kosovës, Albin Kurti dhe ministrja e Arsimit, Arbërie Nagavci.
Kryeministri Albin Kurti ka thënë se objektet në këtë universitet nuk kanë pasur investime që nga vitet e 70-ta.
Ministrja e Arsimit, Shkencës, Teknologjisë dhe Inovacionit, Arbërie Nagavci, ka theksuar se janë ndarë 250 mijë euro për renovimin e objektit të këtij universiteti. Kjo, sipas saj është bërë me synim të përmirësimit të cilësisë në arsim.
“Qeveria e Kosovës, konkretisht MAShTI, zotimet i ka të shenjta dhe jemi këtu për t’i përmirësuar kushtet në arsim. Ky është një nga nismat tona për përmirësimin e kushteve dhe infrastrukturës në arsim. Për Universitetin tuaj janë ndarë edhe 250 mijë euro për renovimin e këtij objekti. Duke e ditur që këtu nuk ka pasur investime që nga vitet 70-ta, kjo ngjarje e bën edhe në historike”, ka deklaruart Nagavci. Ajo përmendi edhe krijimin e kushteve për studentët me aftësi të kufizuara.
Kurse rektori i Universitetit “Ukshin Hoti”, Mentor Alishani, ka thënë se prezenca e zyrtarëve qeveritarë është dëshmi e përkushtimit për përmirësimin e infrastrukturës. Sipas tij, rëndësia e infrastrukturës është jetike për përmirësimin e arsimit në vend./rtk