Katër qytetarë në raste të ndryshme kanë raportuar se janë kërcënuar nga persona të caktuar gjatë 24 orëve të fundit në Prishtinë, raporton teve1.info
Sipas raportit policor të ditës së fundit, rasti i parë ka ndodhur në rrugën “Ndue Perlleshi” ku një qytetar e ka kërcënuar përmes rrjeteve sociale një femër.
I dyshuari është arrestuar dhe dërguar në mbajtje.
“Rr. Ndue Perlleshi, Prishtinë /20.12.2023 – 09:13. Është arrestuar i dyshuari mashkull kosovar, pasi që një kohë të gjatë përmes rrjeteve sociale ka kanosur viktimën femër kosovare. Me vendim të prokurorit i dyshuari është dërguar në mbajtje”, thuhet në komunikatën e Policisë.
Rasti i dytë i kërcënimit gjatë 24 orëve të kaluara ka ndodhur në rrugën “Ilir Konushevci” në kryeqytet ku është arrestuar një mashkull pasi e kishte kërcënuar një mashkull tjetër derisa ai ishte në lokalin e tij.
I dyshuari është dërguar në vuajtje të dënimit pasi është konstatuar se kishte urdhëresë aktive të dënimit.
“Rr.Ilir Konushevci-Prishtinë, 20.12.2023-16:00. Është arrestuar i dyshuari mashkull kosovar pasi që i njëjti kishte kanosur me armë viktimën mashkull kosovar deri sa ai ka qenë në lokalin e tij. Gjatë verifikimit i dyshuari i lartcekur ka rezultuar se kishte urdhëresë aktive dhe i njëjti është dërguar në vuajtje të dënimit”, thuhet në njoftimin policor.
Dy rastet tjera të kërcënimit kanë ndodhur në mes të dy femrave dhe dy vëllezërve, ku në raste të ndryshme kanë kërcënuar njëri-tjetrin.
E dyshuara femër është dërguar në qendrën e ndalimit policor, derisa dy të dyshuarit meshkuj janë dërguar në mbajtje.
“Prishtinë 20.12.2023-11:10. Është arrestuar e dyshuara femër kosovare pasi që dyshohet se e kishte kanosur viktimën femër kosovare. Me vendim të prokurorit kujdestar e dyshuara është dërguar në qendrën e mbajtjes.
Prishtinë 20.12.2023-18:30. Janë arrestuar dy të dyshuar meshkuj kosovarë (vëllezër) nën dyshimin se të njëjtit për motive (ende) të panjohura kanë kanosur njëri-tjetrin. Me vendim të prokurorit, të dyshuarit janë dërguar në mbajtje. Rasti duke u hetuar”, thuhet në njoftimin policor.