Takimi ndërmjet presidentes, Vjosa Osmani dhe kryetarit të Aleancës për Ardhmërinë e Kosovës, Ramush Haradinaj, i paraparë të mbahet të hënën ka dështuar.
Arsyeja sipas zyrtarëve të AAK-së është se e para e vendit nuk ka respektuar orarin e përcaktuar.
Kushtrim Xhemaili, zëdhënës i kësaj partie, për teve1.info tha se ata kishin vullnet për të mbajtur këtë takim dhe diskutuar për draft-statutin e Asociacionit.
“Dje e kishim një vullnet të mirë për të biseduar me Presidenten Osmani për çështjet me rëndësi për vendin, veçanërisht për draft-statutin e Asociacionit. Kryetari Ramush Haradinaj si dhe Sekretari i Përgjithshëm Muharrem Nitaj ishin në Presidencë në orarin e përcaktuar nga Presidentja Osmani, por fatkeqësisht Presidentja nuk respektoi orarin e caktuar nga vetë ajo dhe për këtë arsye takimi nuk është realizuar”, ka thënë ai.
Ndërsa, Bekim Kupina këshilltar për Media i Presidentes, ka thënë takimi nuk është realizuar për shkaqe protokollare.
Ai për teve1.info ka thënë se kreu i AAK-së nuk ka dashur të presë derisa protokolli e ka njoftuar Presidenten për arritjen e tij.
“Takimi ishte paraparë të mbahet, por për shkaqe protokollare nuk është realizuar. Z.Haradinaj nuk ka dashur të presë derisa protokolli e ka njoftuar Presidenten për arritjen e tij. Pavarësisht kësaj, Presidentja Osmani ka lënë të hapur mundësinë e takimit ditëve në vazhdim, kurdo që kreu i AAK-së e vlerëson se duhet diskutuar dhe adresuar çështjet e rëndësisë nacionale. Dera e Presidencës vazhdon të mbetet e hapur”, ka thënë Kupina.
Osmani të hënën ka takuar kryetarin e LDK-së, Lumir Abdixhikun, ndërsa nga PDK-ja kanë refuzuar të shkojnë në këtë takim.