Kampioni i Kosovës në futboll, Ballkani i ka dhënë fund rrugëtimit evropian këtë edicion. Të enjten mbrëma, Ballkani u eliminua nga Liga e Konferencës. Rrugëtimi i Ballkanit në këtë garë përfundoi me humbje në Zagreb, të cilën ia shkaktoi skuadra e Dinamos në kuadër të Grupit C. Në duelin e luajtur në stadiumin “Maksimir”, Dinamo shënoi fitore me rezultatin 3:0 dhe të tri golat i shënoi në 20-të minutat e fundit të ndeshjes.
Në fakt, Dinamo golat i realizoi në harkun kohor prej shtatë minutave për të siguruar kalimin në fazën nokaut.
Me këtë fitore, Dinamo ka përfunduar i dyti në grup me nëntë pikë, nëntë sosh më pak se Viktoria Plzeni që realizoi gjashtë fitore në po aq ndeshje të luajtura në këtë fazë. Ballkani, përfundoi i fundit me katër pikë, sa i ka edhe Astana në pozitën e parafundit.
Për Ballkanin, ky ishte edicioni i dytë rresht në fazën e grupeve të Ligës së Konferencës që nuk arriti ta kaloj. Edhe edicionin e shkuar, Ballkani u eliminua në këtë fazë duke përfunduar i fundit në grup. Megjithatë, është ekipi i vetëm nga Kosova që për vitin e dytë rresht ka arritur të jetë pjesë e sezonit të rregullt të njërën prej tri garave të UEFA-s. Në gjashtë ndeshje të luajtura këtë edicion, Ballkani ka regjistruar një fitore, një barazim dhe katër humbje. Në duelin e fundit të grupit ndaj Dinamos, Ballkani u mbajt mirë deri në minutën e 70-të.
Madje, Dinamo e zhbllokoi rezultatin në momentet më të mira të Ballkanit. Dino Periq (70’) dhe Bruno Petkoviq (72’, 77’) shënuan për fitoren e Dinamos, që iu hakmor Ballkanit për humbjen në Prishtinë (2:0). Pjesa e parë e takimit përfundoi 0:0, ndonëse skuadra vendase pati një dominim të lehtë dhe në disa raste tentoi ta rrezikonte portën e Enea Koliçit por pa sukses. Gjatë 45 minutave të para, Ballkani tentoi nëpërmjet kundërsulmeve të bëjë diçka më shumë, por prej minutës së 31-të mbeti pa mesfushorin Nazmi Gripshi, i cili u detyrua të largohet për shkak të lëndimit. Në vend të Gripshit u inkuadrua Marsel Ismajlgeci. Pjesa e dytë e ndeshjes nisi me Ballkanin që filloi sulmet drejt portës së Dinamos dhe u tregua me dominant. Përkundër disa tentimeve dhe gjysmërasteve të krijuara, Ballkani nuk arriti të shënonte. Dhe, kur pritej goli i Ballkanit, skuadra e Dinamos befasoi. Në minutën e 70-të, Dino Periq e zhbllokoi rezultatin. Periq shënoi me kokë pas harkimit të Josip Misiqit nga këndi. Nuk vonoi shumë dhe Dinamo e shënoi edhe golin e dytë. Skuadra vendase e dyfishoi epërsinë dy minuta më vonë, por këtë herë realizoi sulmuesi Bruno Petkoviq. Petkoviq në minutën e 72-të përfitoi nga një top i kthyer nga Enea Koliçi për të realizuar nga afërsia. I njëjti futbollist shënoi edhe golin e tretë për Dinamon dhe të dytin personal në këtë takim. Në minutën e 77-të, Petkoviq u tregua i saktë nga penalltia, të cilën e shkaktoi mbrojtësi Lumbardh Dellova. Deri në fund të takimit, Ballkani u mundua të shënoj golin e nderit por Dinamo u kujdes që këtë ndeshje ta fitoj me tri gola epërsi. Ndërkohë, dueli tjetër i këtij grupi, ai ndërmjet Viktoria Plzenit dhe Astanas përfundoi me fitoren 3:0 të ekipit çek. Plzeni dhe Dinamo do të paraqiten në fazën nokaut të grupeve, ndërsa shorti për këtë fazë të Ligës së Konferencës do të tërhiqet të hënën në Nyon të Zvicrës.