Qeveria e Kosovës sot ka zhvilluar mbledhjen e 177-të elektronike.
Përmes një komunikate të lëshuar për media, kanë njoftuar se në këtë mbledhje janë marrë tri vendime, shkruan teve1.info.
Sipas komunikatës së Qeverisë, në këtë mbledhje është bërë rialokimi i mbi 320 mijë eurove për Ministrinë e Kulturës të cilat do të destinohen për programin “Masat preventive – intervenime emergjente” nëpër komuna të ndryshme.
Në këtë mbledhje po ashtu u mor vendim që të kërkohet nga Presidentja nënshkrimi i marrëveshjes me Bankën Evropiane për Rindërtim dhe Zhvillim (BERZH) për projektin e trajtimit të ujërave të zeza në Ferizaj.
“Qeveria e Republikës së Kosovës sot ka zhvilluar një mbledhje elektronike në të cilën ka: Rialokuar 320,428.00€ për Ministrinë e Kulturës, Rinisë dhe Sportit, në shërbim të zbatimit të Programit “Masat preventive – intervenime emergjente” nëpër komuna të ndryshme. Miratuar vendimin për dhënien e pronës së paluajtshme, të konfiskuar me Aktgjykimin e Gjykatës Themelore në Prishtinë PKR Nr. 1046/16, në shfrytëzim për Odën e Ndërmjetësuesve të Kosovës. Aprovuar vendimin për të kërkuar nga Presidentja e Republikës së Kosovës dhënien e autorizimit për Ministrin e Financave, Punës dhe Transfereve, për nënshkrimin e Marrëveshjes së Kredisë ndërmjet Republikës së Kosovës, e përfaqësuar nga Ministria e Financave, Punës dhe Transfereve dhe Bankës Evropiane për Rindërtim dhe Zhvillim për Projektin e trajtimit të Ujërave të zeza në Ferizaj”, thuhet në komunikatë./teve1.info/.
