Presidentja e Kosovës, Vjosa Osmani, ka thënë se anëtarësimi i Kosovës në NATO duke filluar me përfshirjen në Partneritetin për Paqe, do të siguronte stabilet dhe paqe në rajon.
Ajo në takimin që ka zhvilluar me të dërguarin e posaçëm të Mbretërisë së Bashkuar për Ballkanin Perëndimor, Lordin Stuart Peach, ka folur për rëndësinë e anëtarësimit të Kosovës në Këshillin e Evropës dhe në organizata të tjera ndërkombëtare.
“Presidentja Osmani potencoi se anëtarësimi në Këshillin e Evropës do të ishte hap i rëndësishëm për fuqizimin dhe avancimin e mëtejmë të të drejtave të njeriut nëpërmjet mekanizmave që i ofron Këshilli, e të cilat do të shërbejnë si mekanizëm shtesë për mbrojtjen dhe garantimin e të drejtave të të gjithë qytetarëve të Kosovës pa dallim. Presidentja Osmani ritheksoi edhe rëndësinë e anëtarësimit të Kosovës në NATO, duke filluar me përfshirjen në Partneritetin për Paqe. Në këtë frymë, Presidentja Osmani tha se ky hap është i domosdoshëm për të siguruar paqe dhe siguri afatgjate në rajon dhe më gjerë”, thuhet në komunikatë.
Në takim sipas Presidencës, Lord Peach përgëzoi Presidenten Osmani për përpjekjet e saj të vazhdueshme në avancimin e agjendës për gratë, paqen dhe sigurinë në këtë kohë sfiduese për paqen në botë.
Peach, ka zhvilluar takim edhe me kryeministrin e Kosovës, Albin Kurti./teve1.info/
Kurti: Zbarkimi i 200 trupave britanike po i kontribuon situatës së sigurisë
