Kompania Rajonale e Ujësjellësit “Prishtina” ka bërë të ditur se gjatë ditës së sotme do të bëjë shpëlarjen e linjave magjistrale dhe sekondare në zonat që furnizohen nga liqeni i Badocit.
Krejt kjo, sipas KRU “Prishtina”, me qëllim të përmirësimit të kualitetit të ujit.
“Me rekomandim të DCBDU dhe IKSHPK gjatë ditës së nesërme, 11 nëntor 2023, e shtunë KRU” Prishtina” do të bëj shpërlarje të linjave magjistrale dhe sekondare në zonat që furnizohen nga ITU Badoc, me qëllim të përmirësimit të kualitetit të ujit”, thuhet në njoftim.
Sipas njoftimit, zonat që do të kenë çrregullime në sistemin e furnizimit me ujë janë ato që ishin të prekura javëve të fundit nga niveli i lartë i manganit në këtë liqen.
“Zonat që do kenë çrregullime në sistemin e furnizimit me ujë janë po të njëjtat zona të prekura javët e fundit nga niveli i lartë i manganit në liqenin e Badocit. Autobotët janë në terren vazhdimisht për të shpërndarë ujë të pijshëm për pije dhe përgatitje ushqimi”, thuhet tutje në njoftim.
Që disa javë është rekomanduar që zonat që furnizohen me ujë nga liqeni i Badocit të mos e konsumojnë ujin për pije, për shkak të nivelit të lartë të manganit./teve1.info/
