Fundori amerikan, Heremy Harris më nuk është pjesë e skuadrës së Bashkimit. Ekipi nga Prizreni, të mërkurën ka njoftuar se me marrëveshje të dyanshme ka shkëputur kontratën me basketbollistin e huaj. Në njoftimin e tij, Bashkimi ka falënderuar Harrisin për kontributin e dhënë dhe i ka dëshiruar suksese në karrierë. Harris (201 cm) ishte pjesë e Bashkimit prej fillimit të këtij edicioni në Superligën e Kosovës.
Në 6 paraqitje në kampionat, Harris ka pasur një mesatare prej 4 pikëve, 3 kërcimeve dhe 2 asistimeve për ndeshje. Ai bëhet lojtari i dytë që brenda një kohe të shkurtër ka shkëputur kontratën me Bashkimin. Para Harrisit nga Bashkimi është larguar edhe Buzz Anthony. Aktualisht, Bashkimi i ka katër humbje e tri fitore pas shtatë ndeshjeve të luajtura në Superligë.
