Kompania NewCo Ferronikeli ka marrë vendim të ndërpres përkohësisht prodhimin për shkak të, siç thuhet, kostos së lartë të prodhimit, çmimeve të ulëta në tregun botëror dhe rrezikut nga një recesion për mallrat që parashikohet për 2024, raporton teve1.info
Përmes një komunikate për medie të kësaj kompanie, thuhet se këta faktorë kanë sjellë kompaninë para një situate ku po detyrohet të ndërpresë përkohësisht prodhimin deri në një njoftim të dytë.
“Përkundër krizave të papërballueshme për ta vazhduar procesin e prodhimit, kompania bashkë me punonjësit e saj do të gjejnë zgjidhje që kjo periudhë e vështirë të mos i dëmtojë 1.000 punonjësit e saj.
Ndërkohë, gjatë kësaj kohe, NewCo Ferronikeli do të angazhohet për zhvillimin e projekteve që e ulin koston e prodhimit në fabrike si dhe do ta rinovojë teknologjinë me qëllim të rritjes së efiçiencës, për të qenë sa më e gatshme për rinisjen e prodhimit në të ardhmen.
Ne kemi besim të palëkundur te kompania jonë NewCo Ferronikeli, te perspektiva premtuese e nikelit, si dhe jemi të përkushtuar për ta vazhduar prodhimin në momentin që krijohet një klimë më e favorshme për industrinë tonë”, thuhet ndër të tjera në komunikatë.
