Qeveria e Kosovës në mbledhjen e mbajtur sot pasdite ka miratuar Projektligjin për ndarjet buxhetore për vitin 2024.
Ky projektligj do të procedohet në Kuvendin e Kosovës për shqyrtim dhe miratim.
Ndryshe, kryeministri Albin Kurti, në këtë mbledhje ka thënë se buxheti për vitin 2024 do të jetë 3 miliardë e 314 milionë euro.
Kurti po ashtu, ka theksuar se tri krizat globale që sipas tij, i kanë menaxhuar në këtë qeverisje janë pandemia COVID-19, rritja e inflacionit, si dhe rritja e çmimeve.
Ai tha se përveç tyre kanë arritur të rrisim ekonominë dhe t’i shtojmë vendet e punës.
“Pandemi si ajo e COVID-19 ndodh që të shfaqet një në 100 vjet, çmimet janë rritur sikur nuk ishin parë asnjëherë më parë, është krahasim i përafërt me krizën që ishte shfaqur në vitet e 70-ta, rritja e inflacionit në dyshifror ishte parë si në vitet e 80-ta diçka që ndodh në 40 vjet”.
“Për fatin tonë si qeveri tri kriza globale me gjasa të vogla të ndodhin me një mandat ia dolëm t’i menaxhojmë më mirë se sa të tjerët që na prognozojnë. Jo vetëm që i menaxhuam me sukses, por gjatë këtyre viteve arritëm edhe të rrisim ekonominë, edhe t’i shtojmë vendet e punës, gjysma e të punësuarve janë të ri e të reja nën moshën 25-vjeçare”, ka thënë Kurti.