Ministrja e Ekonomisë, Artane Rizvanolli nuk do të raportojë sot në Komisionin për Ekonomi, Industri, Ndërmarrësi dhe Tregti, lidhur me gjendjen e krijuar në ndërmarrjen “Trepça”. Kjo pasi ajo ka njoftuar se është në një udhëtim jashtë vendit.
Kështu bëri të ditur gjatë kësaj mbledhjeje, kryesuesi i këtij Komisioni, Ferat Shala, përcjell teve1.info
Deputeti Shala theksoi se së bashku me anëtarët e tjerë të Komisionit do të kenë një takim me sindikalistët, të cilët janë aty me ftesë të Lëvizjes Vetëvendosje.
“Po pajtohemi që pas 15 minutash të takohemi në sallën e propozuar që të kemi takim me sindikalistët”, deklaroi ai.
Për mosraportimin e ministres Rizvanolli, deputeti i AAK-së, Pal Lekaj tha se ftesa e LVV-së ndaj sindikalistëve është manipulim.
“Dhe sot, grupi parlamentar i LVV-së pa u konsultuar fare me Komisionin për Ekonomi i thërret sindikatat për me i politizuar dhe për me i dhënë kahje politike dhe jokahje që është dashtë ministrja sot të vjen e të raporton këtu. Dhe mendoj se është manipulim i llojit të vet për atë çka po ndodh. Minatorët kërkojnë zgjidhje, kërkojnë të gjitha ato që janë elementare. Një kryeshef që s’qan kokën për minatorët, çka duhet tjetër, edhe ushtrues detyre dhe i keni qit me rreziku jetën minatorëve për një ushtrues detyre. Çka e lidh ministren për atë kryeshef, çka e lidh Qeverinë me atë kryeshef? Është biznes, a është çka? Me rreziku një jetë të minatorëve për një ushtrues detyre. Edhe me i lanë që tetë ditë minatorët në grevë. Është me të ardhë keq për sjelljen e ministres maspari dhe Qeverisë të Kosovës”, u shpreh ai gjatë mbledhjes së Komisionit.
Ndërkaq shtoi se pavarësisht se Rizvanolli është jashtë vendit, është dashur patjetër të vijë dhe të raportojë për gjendjen. /Teve1.info/
