Ish-zëvendësministri i Punëve të Jashtme, Anton Berisha, thotë se presioni ndërkombëtar, sidomos i Gjermanisë dhe Francës do të përmbyllë procesin e dialogut Kosovë – Serbi.
Sipas tij, ky kanalizim është në të mirën e Kosovës, sepse zvarritja e procesit i konvenon vetëm Serbisë.
“Unë besoj që presioni ndërkombëtar, presioni i diplomatëve dhe shteteve kryesore, sidomos Gjermanisë dhe Francës, do të kanalizojë procesin, sepse fundi i fundit ajo është në të mirën e Kosovës. Ndërsa, Serbisë i konvenon zvarritja, status quo-ja, si thotë populli për hatër e zgjat pafundësisht, sepse ata jetojnë me shpresën e dështimit të Kosovës dhe kthimit të Serbisë në Kosovë”, tha ai në emisionin “Ditari” në Tëvë1.
Ish-zëvendësministri i Punëve të Jashtme thotë se është e pandërgjegjshme që Kurti të humbë tri vjet me çështjet e targave dhe me kryetarët e komunave në veri të vendit.
“Kosovës nuk i konvenon zgjatja dhe status quo-ja, sepse procesi i shtetndërtimit i pa përmbyllur dhe Kosova nuk është e njohur nga pesëshja evropiane nga shumë shtete të OKB-së, nuk është pjesë e NATO-s, këto janë vitale për interesin e Kosovës. Është krejtësisht e pandërgjegjshme që Kurti të humb tri vjet në tema krejtësisht të parëndësishme: targat, regjistrimi i makinave, kryetarët e komunave, etj”, deklaroi Berisha.
Sipas tij, marrëveshjet ndërkombëtare janë të detyrueshme për Kosovën.
“Marrëveshjet ndërkombëtare janë të detyrueshme. Sepse, ne jetojmë në kontinentin e Evropës, kontinent që ka standarde për të gjitha temat dhe kur një shtet merr përsipër një detyrim, në marrëveshjet ndërkombëtare në relacion edhe me BE-në, atëherë është jo serioze që me ndërrimin e qeverisë të mos zbatohet ajo marrëveshje. Është mirë, ndonëse me vonesa që kryeministri cili do qoftë, në këtë rast Kurti që ka hyrë në kornizën e pranimit të marrëveshjes dhe të implementimit të saj, fundi ai vetë është pajtuar në Ohër”, shtoi Berisha.
Gjatë ditës së sotme kryeministri i Kosovës, Albin Kurti, ka realizuar dhe po zhvillon takime me liderët e Bashkimit Evropian. Kurti dhe presidenti i Serbisë, Aleksandër Vuçiq, janë pritur nga kancelari gjerman, Olaf Scholz, presidenti francez, Emmanuel Macron, kryeministrja italiane, Giorgia Meloni, si dhe përfaqësues të lartë të BE-së.
Lidhur me këto takime ende nuk janë deklaruar palët, as ajo kosovare e as serbe./teve1.info/
