Trupi zgjedhor i Bashkësisë Islame të Kosovës, në një mbledhje të veçantë, ka rizgjedhur në krye të këtij institucioni fetar edhe për një mandat pesë vjeçar, myftiun Naim Tërnava.
Kryetarë e Këshillave dhe drejtuesit e institucioneve të Bashkësisë Islame në gjithë Kosovën, në mënyrë unanime votuan për zgjedhjen e Tërnavës.
Si kandidat i vetëm në këtë garë, Naim Tërnava do të jetë në krye të BIK-ut deri në vitin 2028.
Kjo është hera e pestë që Tërnava rimerrë drejtimin e BIK-ut.
Tërnava falënderoi të gjithë për besimin e dhënë dhe për mbështetjen e ofruar në mandatet e kaluara, teksa tha se prioritet në mandatin e ri është edukimi, arsimimi, avancimi dhe fisnikërimi i qytetarëve.
“Ndër prioritetet kryesore është edukimi, arsimimi, avancimi dhe fisnikërimi i popullatës sonë për dynja e ahiret, ngritja, zhvillimi dhe avancimi e standardizimi i institucioneve e forumeve tona, në funksion të kërkesave të kohës për të organizuar, përgatitur e mbështetur besimtarët tanë anekënd vendit”, tha ai.
Myftiu Tërnava propozoi dhe më pas u miratuan nga Trupi Zgjedhor tetë anëtarët e Kryesisë:
Burhan Hashani – Prishtinë, Shkëlzen Hoxha – Mitrovicë, Musli Arifaj – Pejë, Valon Myrta – Gjakovë, Orhan Bislimaj – Prizren, Sevdair Haxhiu – Feriaj, Agim Hyseni – Gjilan, Sylejman Fejzullahu – Kosovë Lindore.
