“Nuk ka vend më të vetmuar në këtë univers sesa ai rreth shtratit të një fëmije të plagosur në Gaza që nuk ka më familje për t’u kujdesur për të”.
Kështu e përshkruan gjendjen në spitalin Al- Shifa mjeku Ghassan Abu Sittah i cili erdhi nga Britania e Madhe për të trajtuar palestinezët të cilët po plagosen nga sulmet ajrore të Izraelit.
Ditë më parë ai e gjeti veten duke operuar vajzën e koleges së tij.
Mjekja ishte vrarë me fëmijën tjetër dhe vajza e plagosur ishte e vetmja e mbijetuar.
“Çdo ditë kemi këto raste ku na thuhet se ky është i vetmi familjar i mbijetuar” tha ai.
Dr. Abu Sittah ndërkohë thotë se familja e tij në Britaninë e Madhe është vizituar nga policia britanike kundër terrorizmit.
“Më duhet të zbuloj pse dikush mendoi se ishte një ide e mirë të pyeste gruan time se në cilën pjesë të spitalit jam, kush pagoi biletën time dhe për cilën organizatë bamirëse punoj” tha Abu Sittah për BBC-në.
Sipas doktorit , rreth 40% e atyre që janë sjellë në këtë spital të Rripit të Gazës janë fëmijë.
Autoritetet në Gaza thonë se që nga fillimi i konfliktit ndërmjet Izraelit dhe Hamasit të paktën 2,750 njerëz janë vrarë, një e katërta e tyre fëmijë, shkruan BBC, transmeton Tëvë1.
