Në një përgjigje për teve1.info, Ministria e Shëndetësisë ka bërë të ditur se për momentin situata me koronavirus në vend është e qetë.
“Aktualisht janë në fuqi masat e ndërmarra së fundi nga Qeveria e vendit, që realisht kanë qenë masa për heqjen e disa kufizimeve. Përmes IKSHPK-së, përcillet dhe analizohet situata epidemiologjike në baza të rregullta dhe për momentin ajo reflekton e qetë”, është thënë nga MSH-ja.
Por, Instituti Kombëtar i Shëndetësisë Publike të Kosovës (IKSHPK) po u bën vazhdimisht thirrje qytetarëve që të kenë kujdes nga dy variantet e Omicron-it të cilat, sipas tyre, po vazhdojnë të përhapen me pasoja të rënda për shëndetin e qytetarëve dhe me raste fatale.
Lidhur me këtë, nga MSH-ja thonë se të dhënat nga organizata të ndryshme shëndetësore në botë tregojnë se variantet BA.1 dhe BA.2 transmetohen më shpejt, por janë më të lehta sa i përket shenjave.
Sipas MSH-së, pavarësisht kësaj, qytetarët duhet që të vaksinohen edhe me dozën e tretë, sidomos grupmoshat e vjetra.
“Është realitet se në disa shtete të Azisë dhe Evropës ka një rritje të rasteve të COVID-19, të shkaktuara nga varianti BA 2 sidomos, por të dhënat nga organizata të ndryshme shëndetësore në botë flasin për një transmetueshmeri të lartë të këtij nënvarianti, por me një manifestim më të lehtë sa u përket shenjave apo manifestimit klinik të të prekurve. Kjo, megjithatë kërkon kujdes dhe mbi të gjitha vijim të vaksinimit, sidomos me dozën e tretë të grupmoshave më të vjetra”, thuhet në përgjigjen e MSH-së për teve1.info
Ministria bën të ditur se në imunizimin e popullsisë në Kosovë ka ndikuar vaksinimi, por me kalimin e kohës edhe dobësimi i virusit dhe varianteve të tij.
Pavarësisht kësaj, MSH-ja u bën thirrje qytetarëve që mos ta nënvlerësojnë koronavirusin, të tregojnë kujdes maksimal dhe të vaksinohen.
“Në situatën epidemiologjike ka ndikuar sigurisht edhe vaksinimi, pra imunizimi i popullatës (natyral dhe përmes vaksinimit), por me kalimin e kohës edhe dobësimi i virusit apo varianteve të tij, që megjithatë nuk duhet nënvlerësuar asnjëherë dhe duhet bërë kujdes maksimal dhe vaksinuar”, thuhet në përgjigjen e MSH-së.
Ndryshe, në 24 orët e fundit janë raportuar 32 raste pozitive me COVID-19 dhe dy raste të vdekjes.
Ndërkaq, janë dhënë 278 doza të vaksinës, teksa prej fillimit të vaksinimit, në të gjitha qytetet e Kosovës janë dhënë 1,822,098 doza të vaksinës. /Teve1.info/
