Kuvendi i Kosovës po mban seancë të jashtëzakonshme, në të cilën pikë e rendit të ditës do të jetë “Shqyrtimi i Propozim-Rezolutës për mbështetjen urgjente financiare për Policinë e Kosovës”.
Megjithatë, në miratimin e kësaj rezolute, Lëvizja Vetëvendosje ka vendosur të mos marrë pjesë, ku paraprakisht njoftoi, Shefja e Grupit Parlamentar e kësaj partie, Mimoza Kusari-Lila.
E një vendim të tillë nuk e mirëpriti, Shefi i Grupit Parlamentar të PDK-së, Abelard Tahiri, teksa e cilësoi si ikje të përgjegjësisë.
“Ky është vendi që duhet të mbështetet Policia e Kosovës, nuk mjafton me llafe boshe, e me fjalë të mira, me fotografi në Facebook e Instagram, ta përkrahin Policia e Kosovës. Sot e 8 muaj ata njerëz nuk i kanë marrë shtesat e rrezikshmërisë, e në anën tjetër i kemi në vijë të parë të frontit. Të gjitha këto janë të rëndësishme që sot të debatohen në Kuvend. Është e papranueshme mos pjesëmarrja dhe ikja nga përgjegjësia e kësaj mazhorance. Këta përfaqësues të këtij 50 përqindëshit, i ikin pjesëmarrjes në këtë seancë dhe i ikin mbështetjes që duhet t’ia japin Policisë së Kosovës. Andaj ne si deputetë të opozitës nuk heqim dorë”, deklaroi Tahiri para deputetëve në Kuvend.
Madje, Tahiri tha se kryeministri i vendit, Albin Kurti, është duke e nxitur një situatë të tillë.
“Nëse kryeministri i Kosovës na injoron dhe nuk i përgjigjet pyetjeve parlamentare, ne nuk e penguam seancën. Ne jemi në vendin tonë të punës, nuk mundet as kryeministri as Qeveria, të na i diktojë rregullat se si duhet të sillemi. Prandaj, krejt ky degjenerim që ka ndodhur dhe që po ndodhë në vazhdimësi, i thirrur nga Albin Kurti, e mbështetur nga kjo mazhorancë, duhet të marrë fund”, shtoi tutje Tahiri.
Andaj, Tahiri vlerësoi që Kosova tani do duhej të tregonte më së shumti unitet për Policinë e Kosovës.
“Të rrinë duarkryq dhe të ikin nga një seancë e tillë, është turp i madh”, potencoi shefi PDK-së.
Kujtojmë se Policia e Kosovës përmes një peticioni drejtuar Kuvendit të Kosovës, ka kërkuar përmirësimin e kushteve të punës./teve1.info/.
