Kryeministri i vendit, Albin Kurti ka refuzuar t’u përgjigjet pyetjeve parlamentare të deputetëve që nuk kanë votuar marrëveshjet ndërkombëtare.
Në seancën që po mbahet në Kuvend, Kurti tha se deri tani nuk ka pasur kryeministër që u është përgjigjur më shpesh e me më përpikëri pyetjeve parlamentare, përcjell teve1.info
“Për shkak se nuk po i votoni marrëveshjet ndërkombëtare, të gjithë deputetët që i bëjnë pyetjet nuk do ta kenë përgjigjen time, edhe pse e kam tashmë të përgatitur. Duhet të jemi kolegë të të njëjtit shtet, e jemi të të njëjtit shtet, nëse bëhet fjalë për mbrojtjen dhe përfaqësimin e interesit publik dhe shtetëror. Nuk ka pasur kryeministër në Kosovën e pavarur që është përgjigjur më shpesh dhe më me përpikëri pyetjeve parlamentare…rrjedhimisht atëherë kur do të jeni deputete e Kuvendit të Kosovës, vetëm atëherë unë do të përgjigjem në pyetjen parlamentare, sepse sigurohem që bëhet fjalë për parlamentin e Kosovës”, deklaroi ai.
Siç potencoi kreu i Ekzekutivit, “nuk mund të bësh pyetje parlamentare kryeministrit, dhe ta dëmtosh shtetin në masën e përgjithshme 360 milionë euro nga ajo një dyzinë marrëveshje ndërkobëtare që ju refuzoni t’i votoni”. /Teve1.info/
