Vladmir Lazareviq, Veselin Sljivancaniq, Nikola Sainoviq dhe Vojsilav Sheshel e kanë një të përbashkët.
Që të katërtit janë të dënuar për krime lufte nga Tribunali i Hagës.
Këtë e kanë thënë për Tëvë1 politikani serbë, Nenad Qanak dhe hulumtuesi Marko Millosavljeviq.
Ky i fundit thotë se e kanë dokumentuar përkrahjen e këtyre personave për subjektin që e drejton Vçiqi.
“Ne e kemi dokumentuar tash e sa kohë që këta persona mbështesin Partinë Progresive Serbe dhe Partine Socialiste Serbe. Për më tepër njëri nga ta ka lidhje me krimet që kanë ndodhur në Kosovë, ai është Vladmir Lazareviq. Këta persona vazhdimisht janë glorifikuar nga Qeveria e Serbisë. Këta persona nuk duhet glorifikohen nga Qeveria e Serbisë dhe nuk duhet të kenë hapësirë në jetën politike”, tha ai.
Në anën tjetër Kryetari i Lidhjes Socialdemokrate, Nenad Qanak, thotë se fatkeqësisht nuk ka një ligj në Serbi që ua ndalon aktivitetin politik personave të dënuar për krime lufte. Sipas tij, këta persona janë relik të Sllobodan Millosheviqit.
“Fatkeqësisht në Serbi, nuk ka një ligj që ua ndalon këtyre personave pjesëmarrjen në jetën politike. Ne tani po shohim disa relikë të Slobodan Millosheviqit që janë aktiv në jetën politike në Serbi. Parlamenti Serb duhet të nxjerrë një rezolutë për t’i dënuar ata, unë vet e kam kërkuar një gjë të tillë. Por siç po shihet Serbia akoma nuk është gati për këto ndryshime.”
Tëvë1 ka kërkuar një qëndrim edhe nga Bashkimi Evropian për këtë çështje, por BE-ja nuk kishte përgjigje.
Zgjedhjet në Serbi do të mbahen me datën 3 Prill, ku do të jenë 8 kandidatë për President. Shumica prej tyre kanë bindje të forta nacionaliste dhe e mohojnë pavarësinë e Kosovës.
Kronika e realizuar nga Shpat Blakçori
