Dialogu, shihet si mënyra e vetme për arritjen e një marrëveshjeje të paqes mes Kosovës dhe Serbisë. Gjermania, përkatësisht kancelari Olaf Scholz, aktualisht është më i zëshmi nga përfaqësuesit ndërkombëtar që po i fton palët të kthehen në dialog. Ndërkohë, ka vlerësime të ndryshme rreth angazhimit francez, marrë parasysh faktin se një marrëveshje tashmë është dakorduar mbi bazën e planit franko-gjerman.
Qëndrimi zyrtar i Bashkimit Evropian është se palët pavarësisht rastit të rëndë që ka ndodhur më 24 shtator, duhet të kthehen në dialog.
Një reagim të zëshëm të pavarur nga BE-ja e ka pasur edhe kancelari gjerman Olaf Scholz, i cili përveç dënimit të aktit terrorist, ka kërkuar që Kosova e Serbia duhet t’i vazhdojnë negociatat.
Arbër Fetahu nga Grupi për studime Juridike dhe Politike, thotë se qëndrimi gjerman mund të ndikoj pozitivisht në dialog, por sipas tij, Franca ka një qëndrim më të butë.
“Ka qenë një reagim shpresëdhënës që qëndrimi i Gjermanisë në një far forme mund të ndikoi në aspekte tjera të politikë-bërjes edhe në Bashkim Evropian edhe më gjerë dhe mund ta qojë një drejtim tjetër edhe dialogun Kosovë – Serbi, por edhe raportin e forcave dhe raportin e BE-së, kundrejt Kosovës dhe Serbisë me kthimin e mundshëm në tavolinën e bisedimeve. Ajo çfarë mund të vihet në pah është një reagim pak më i mangët i Francës, të paktën një reagim performativ apo publik. Është pak më i butë krahas me Gjermaninë, apo krahas me SHBA-në”, ka thënë Arbër Fetahu nga Grupi për Studime Juridike dhe Politike.
Politikani i CDU-së gjermane, Kolë Gjoka, thotë se nga mungesa e unitetit me Parisin, Berlini do t’i shtyj proceset për para në koordinim më Uashingtonin.
“Kjo është lufta nënrrogoz midis Berlinit dhe Parisit se kush është promotori i Evropës… Marrëveshja do të arrihet patjetër, sepse është edhe në interesin e Serbisë që të përafrohet me Bashkimin Evropian … Është shumë vështirë që të bisedosh me serbë në mënyrë të hapur dhe të bësh kompromise të mëdha. Të vetmit janë ata, Berlini dhe Uashingtoni që do ta detyrojnë Serbinë që të kthehet në rrugën e duhur”, është shprehur politikani i CDU-së gjermane, Kolë Gjoka.
Edhe qëndrimi zyrtar i SHBA-së është se Kosova dhe Serbia duhet të kthehen në dialog edhe pas sulmit të 24 shtatorit.