Parlamenti Evropian do të votojë për rezolutën për marrëdhëniet mes Kosovës dhe Serbisë në seancën e dytë plenare të tetorit në Strasburg të enjten, më 19 tetor.
Debati për dokumentin, titulli i plotë i të cilit është “Rezoluta për zhvillimet e fundit në dialogun Serbi-Kosovë, përfshirë situatën në komunat në veri të Kosovës”, është mbajtur të martën, një ditë pasi socialdemokratët në Parlamentin Evropian kanë kërkuar që debati të kthehet në rezolutë.
Eurodeputetët kërkuan qetësimin e situatës në veri dhe ndëshkimin e Serbisë nëse zbulohet se qëndron pas sulmit të armatosur në Banjskë të Zveçanit më 24 shtator, ku mbeti i vdekur rreshteri i Policisë së Kosovës, Afrim Bunjaku.
Nëse dëshmohet se pas sulmit në Banjskë qëndron Serbia, atëherë do të merren masa me pezullim nga takimet e nivelit të lartë, deri te pezullimi i plotë i financimit nga programi IPA3 dhe projektet të mëdha të infrastrukturës.
