Votat filluan të futeshin në kuti pak minuta para mesnate.
Por numërimi dhe shpallja e rezultateve të votimit për presidente të Republikës së Kosovës, u ndodhi në minutat e para të datës shtatë tetor.
Këto minuta përtej datës gjashtë tetor, vlerësohet se nuk përbëjnë shkelje kushtetuese.
“S’ka asnjë shkelje. Zgjedhja është kryer në mënyrë kushtetuese, procesi i votimit ka fillu me kohë. Në disa shtete madje rezultatet vonohen edhe me ditë. Numërimi i votave merr edhe me ditë. Me rëndësi që procesi ka fillu me kohë. Dhe fakti që ka zgjatë pesë-gjashtë minuta, ose disa minuta përtej, s’ka asnjë relevancë juridike”, ka thënë hartuesi i Kushtetutës, Arsim Bajrami.
Madje, numërimi dhe shpallja e rezultatit, konsiderohet vetëm si çështje teknike.
“Çështja e votimit është kry dhe tani ka mbetë çështja teknike konsideroj, se teknike është numërimi dhe shpallja e rezultatit. Dhe prandaj mendoj se ka mundësi që të merret si valid, zgjedhja e presidentes. Por është e vërtetë, se shpallja e presidentit është bërë pas orës 24, domethënë me datë shtatë”, u shpreh ish kryetari i Gjykatës së Apelit, Hasan Shala.
Sipas një interpretimi tjetër, nga koha kur ka filluar votimi i presidentes, ka filluar të rrjedhë edhe afati gjashtëdhjetë ditor.
“Pika tjetër e referimit apo e sqarimit është neni 82, pika 3, ku thuhet se presidenti i Kosovës zgjedhet prej momentit kur fillon procedura e duhet të kalojnë gjashëdhjetë ditë. Kështu që, ne jemi në rregull”, tha profesori i të Drejtës Kushtetuese, Kadri Kryeziu.
Kontestimin e këtij procesi në Gjykatë Kushtetuese, mund të bëjnë deputetët e Kuvendit, që së paku duhet të jenë dhjetë në numër.
Megjithatë, për këtë çështje, Kushtetueses përmes një njoftimi iu është drejtuar avokati, Arianit Koci.
