Organizatori i protestës “Jo në emrin tim”, Çlirim Haziri, ka bërë thirrje për lirimin e dy veteranëve të UÇK-së, të cilët, sipas tij, janë ndaluar gjatë protestave të zhvilluara ditëve të fundit.
Përmes një postimi, Haziri ka thënë se votimi i Ligjit për UÇK-në ishte një moment krenarie, por sipas tij, ky moment mbetet i paplotë përderisa dy protestuesit vazhdojnë të jenë të ndaluar.
“Gjatë ditëve të protestës, u ndaluan dy qytetarë, të cilët janë edhe veteranë të UÇK-së. Dalja e tyre në shesh nuk ishte asgjë më shumë se një shprehje e natyrshme për të mbrojtur historinë dhe vlerat për të cilat dikur ishin të gatshëm të jepnin jetën”, ka shkruar Haziri.
Ai ka kritikuar masat ndaj dy veteranëve, duke vlerësuar se nuk është e drejtë që ata të trajtohen me masa të tilla vetëm për shkak të pjesëmarrjes në protestë.
“Nuk është as e drejtë dhe as njerëzore që ata të trajtohen me masa kaq të ashpra nga shteti i tyre, vetëm pse ngritën zërin për dinjitetin e kombit”, ka deklaruar ai.
Në fund, Haziri u ka bërë thirrje institucioneve të drejtësisë që të shqyrtojnë rastin dhe t’i lirojnë dy veteranët.
“Këta burra e kanë vendin në shtëpitë e tyre, si qytetarë të lirë të Republikës që ndihmuan ta ndërtojnë vetë”, ka shkruar Haziri.
Ndryshe, Policia njoftoi të martën se, në protestën e së hënës “Si pasojë e protestës dhe zhvillimeve në terren, mosrespektimit të thirrjeve të vazhdueshme policore për qetësi dhe rënies ndesh me ligjin, janë shoqëruar në stacion policor tre persona/protestues, ndaj të cilëve të gjitha veprimet e mëtejme do të ndërmerren në bashkëpunim dhe koordinim me organet e drejtësisë”.
