Gjatë ditës së sotme, Policia e Kosovës ka kryer edhe dy bastisje në veri, lidhur me rastin e sulmit terrorist serb në Banjskë të Zveçanit.
Zëvendësdrejtori i Policisë të Kosovës në rajonin e veriut, Veton Elshani bëri të ditur për Teve1.info se nga ky aksion, nuk ka persona të arrestuar.
“Mund ta konfirmoj se kemi kryer bastisje në lidhje me rastin e Banjskës. Njëra bastisje është kryer në Rudarë dhe një tjetër afër komunës në Zveçan. Nuk kemi persona të arrestuar”, theksoi ai.
Më 24 shtator, Policia e Kosovës u sulmua nga një grup kriminelësh serbë në Banjskë të Zveçanit, me ç’rast mbeti i vdekur rreshteri Afrim Bunjaku.
Ministri i Punëve të Brendshme, Xhelal Sveçla ka thënë se do të paraqes dëshmi të reja që tregojnë se në sulm janë përfshirë presidenti i Serbisë, Aleksandar Vuçiq, ministri i Mbrojtjes së Serbisë dhe shefi i komandës së ushtrisë së Serbisë.
Siç ka bërë të ditur ai, përgatitjet e sulmit janë bërë në bazën e trajnimeve ushtarake që gjendet afër Kopaunikut.
Sulmet ndaj Policisë së Kosovës janë dënuar nga Shtetet e Bashkuara dhe Bashkimi Evropian dhe është bërë thirrje që fajtorët të sillen para drejtësisë. /Teve1.info/