Në lagjen “Arbëria” është përuruar parku i ri i cili do të mbajë emrin e ish-kryeministrit të Japonisë Shinzo Abe.
Në përurimin e tij ka marrë pjesë kryetari i Prishtinës, Përparim Rama dhe ambasadori jorezident i Japonisë në Kosovë, Ryuta Mizuuchi.
Rama, përmes një postimi në Facebook, ka shkruar se është nder i madh për kryeqytetin që të përurojmë parkun e ri bashkë me ambasadorin jorezident të Japonisë në Kosovë, Ryuta Mizuuchi.
Ai ka thënë se shndërrimi i kësaj hapësire në park sipas arkitekturës japoneze, do t’ju mundësojë qytetarëve që të kenë më shumë hapësira të gjelbra, rekreative dhe qasje më të shpejtë në qendrën e qytetit.
“Nder i madh për Kryeqytetin që bashkë me Ambasadorin jorezident të Japonisë në Kosovë, Ryuta Mizuuchi, të përurojmë parkun e lagjes “Arbëria” me emrin e ish kryeministrit të Japonisë, mikut të madh të Kosovës, Shinzo Abe. Shndërrimi i kësaj hapësire në park sipas arkitekturës japoneze, do t’ju mundësojë qytetarëve që të kenë më shumë hapësira të gjelbra, rekreative dhe qasje më të shpejtë në qendrën e qytetit”, ka shkruar Rama.
