Tottenhami dhe Liverpooli po kalojnë formë të shkëlqyer në fillim të këtij edicioni.
Të dyja këto skuadra do të ballafaqohen mes vete të shtunën, në ndeshjen derbi të xhiros së shtatë të elitës së futbollit anglez. Ndeshja Tottenham – Liverpool nis në orën 18:30. Fitorja e Tottenhamit 4:1 në “Wembley” në tetor të vitit 2017, ka qenë triumfi i vetëm i kësaj skuadre në 23 ballafaqimet e fundit me Liverpoolin në të gjitha garat. Liverpooli i drejtuar nga trajneri Juergen Klopp, nuk di për humbje në stadiumin e Tottenhamit, duke i fituar tri ndeshje dhe barazuar një herë në katër vizitat e fundit.
Tottenhami po synon që ta vazhdojë serinë e gjashtë ndeshjeve pa disfatë në fillim të këtij edicioni të Premier Leagues. Do të ishte hera e tretë që e përsëritë këtë sukses.
Që nga ardhja e trajnerit Ange Postecoglu, skuadra e Spursit është përmirësuar dukshëm. Postecoglu nuk di për humbje në 40 ndeshje në shtëpi, përfshirë këtu edhe ato që drejtonte Celticun. Ka fituar 35 ndeshje dhe ka barazuar pesë herë në ndeshjet e ligës. Postecoglu përballë do ta ketë Liverpoolin e Kloppit, që po ashtu po kalon formë fantastike në elitën angleze. Ka 17 ndeshje pa disfatë. Humbjen e fundit në ligë, Liverpooli e ka pësuar në prill të vitit të kaluar nga Manchester City. Liverpooli, po ashtu është në seri prej shtatë fitoreve rresht në të gjitha garat, me 20 gola të shënuar.
Liverpooli është i dyti në tabelë me 16 pikë, dy më pak se lideri Manchester City.
Tottenhami në pozitën e katërt ka 14 pikë. Xhiron e shtatë, të shtunën e hap ndeshja ndërmjet Aston Villas dhe Brightonit nga ora 13:30. Arsenali luan në udhëtim te Bournemouthi nga ora 16:00. Në këtë orar luan edhe Manchester Unitedi me Crystal Palacen, kurse Wolverhamptoni e pret Manchester Cityn. Kjo xhiro mbyllet të hënën, me duelin Fulham – Chelsea.
