Deputeti i PDK-së, Xhavit Haliti, në një intervistë ka trajtuar zhvillimet e fundit në Kosovë si dhe raportin në mes të dy kryeministrave, Kurti dhe Rama.
Haliti e ka konsideruar si propagandë të stisur tendencën që Rama të paraqitet si më i afërt me Vuçiqin sesa me Kurtin.
“Unë mendoj që Edi Rama nuk ka pasur qëllim të keq kur e ka thënë atë…edhe pse nuk jam parë me të për ta pyetur se përse e tha, mirëpo ne e kemi dëgjuar shumë mirë edhe qëndrimin e Edit në raport me Bashkimin Evropian i cili nuk pranoi të nënshkruajë pa u futur në deklaratën e BE-së edhe çështja e sulmit ose vrasjes së policit në veriun e Kosovës nga grupi terrorist“, deklaroi Haliti për Euronews Albania.
Haliti theksoi se beson se Edi Rama është në krahë të Kosovës. “Normalisht unë nuk e besoj që ka diçka kundër Kurtit”, u shpreh ai.
Ndryshe Rama, ka thënë se i bashkohet thirrjes së Qeverisë amerikane për de-eskalim të menjëhershëm në kufirin mes Kosovës dhe Serbisë.
Rama ka thënë se iu bën thirrje lidershipit të Kosovës dhe Serbisë që të veprojnë me maturi.
Kreu i Qeverisë shqiptare ka thënë se Shqipëria është e përkushtuar për sigurinë dhe stabilitetin e Kosovës.
“Shqipëria i bashkohet thirrjes së Qeverisë së SHBA-së për deeskalim të menjëhershëm në kufirin mes Kosovës dhe Serbisë. I bëj thirrje lidershipit të Kosovës dhe Serbisë që të veprojnë me përgjegjësi dhe maturi. Shqipëria është e përkushtuar për sigurinë dhe stabilitetin e Kosovës”, ka shkruar Rama.
Ky reagim i Ramës vjen pas deklaratës së SHBA-së për rritjen e numrit të ushtarëve serbë në kufi me Kosovën dhe kërkesës së Washingtonit për tërheqje të tyre.
