Kryeministri i vendit, Albin Kurti, ka vizituar Fondacionin “Terre des Hommes Luasanne”, organizatë joqeveritare që operon në fushën e të drejtave dhe mbrojtjes së fëmijëve në Kosovë.
Kurti ka falënderuar organizatën për punën dhe kontributin e tyre, teksa ka bërë të ditur se Ministria e Drejtësisë, është duke hartuar rregullativa ligjore në funksion të mbrojtjes së fëmijëve nga punët e rënda, e cila përfshinë edhe fëmijët në situatë rruge.
“Kryeministri i Republikës së Kosovës, Albin Kurti, bashkë me Ministren e Drejtësisë, Albulena Haxhiu, sot vizitoi Fondacionin “Terre des Hommes Lausanne” me seli në Kosovë, organizatë joqeveritare që operon për më shumë se 20 vjet në fushën e të drejtave dhe mbrojtjes së fëmijëve në Kosovë. Së fundmi, Ministria e Drejtësisë ka subvencionuar fondacionin TDH me vlerë prej 25,000 euro për projektin “Mbrojtja dhe ofrimi i shërbimeve multi disiplinare për fëmijët në situatë rruge”. Pasi u njoftuan së afërmi me punën e tyre, kryeministri Kurti përgëzoi dhe falënderoi organizatën për punën dhe kontributin tash e 20 vjet. Ai tha se Qeveria nëpërmes ministrive përkatëse, në veçanti Ministrisë së Drejtësisë, është duke hartuar rregullativa ligjore në funksion të mbrojtjes së fëmijëve nga punët e rënda, kategori e cila përfshinë edhe fëmijët në situatë rruge”, thuhet në komunikatë.
Po ashtu, Kurti ka përmendur edhe miratimin e Projektligjit të ri për Shërbim Sociale dhe Familjare në mbledhjen e Qeverisë së 13 shtatori 2023, i cili e trajton në mënyrë specifike çështjen e mbrojtjes sociale për famijët në nevojë sociale dhe fëmijët në situatë rruge.
Qeveria e Republikës së Kosovës cilëson se shërbimet e këshillimit psikologjik, aktivitetet psikosociale, mësimet plotësuese, përkujdesja ditore në qendra ditore dhe shërbimet e tjera reduktojnë mundësinë që fëmijët të gjenden në situatë rruge, kështu duke minimizuar rreziqet e dhunës, shfrytëzimit, keqtrajtimit, por edhe të trafikimit të fëmijëve./teve1.info/.
