Sot situata në Banjska ka qenë e qetë. Njësitet policore kanë vazhduar angazhimin e tyre në zonën ku ditë më parë, grupi terrorist sulmoi forcat e rendit. Atje ende janë duke u zhvilluar kërkime për mbledhjen e provave të tjera, me qëllim zbardhjen e rastit të së dielës.
Gjatës se enjtes në fshatin Banjskë të komunës së Zveçanit, situata ishte e qetë dhe nuk u raportua për ndonjë incident.
Por forcat e rendit, po vazhdonin patrullimin e tyre në disa vende përgjatë rrugës, që të dërgon në këtë fshat.
Përveç patrullimeve të zakonshme, organet e rendit po kryenin edhe punë të tjera në mbledhjen e provave, për sulmin terrorist që ndodhi të dielën.
Një pikë kontrolli e policisë ishte i pozicionuar edhe në brendi të fshatit.
Më në afërsi të manastirit patrullimi policor shtohej.
Ky objekt përcjellës i manastirit ku edhe u pa që gjatë sulmit terrorist ka qëndruar krimineli Millan Radojecic, duket se terroristët e kanë përdorur edhe për të fjetur.
Qetësia që solli policia në këtë vend, i mundësoi klerikut që të pres besimtarët në manastir.
Zëvendësdrejtori i Policisë së Kosovës për rajonin e Mitrovicës së Veriut, Veton Elshani, ka thënë se situata është e qetë dhe se aksioni është duke vazhduar.
“Patrullimet e njësiteve të ndryshme kanë vazhduar për gjatë tërë ditës në dhe rreth hapësirave të manastirit”, tha zëvendësdrejtori i Policisë së Kosovës për Rajonin e Mitrovicës, Veton Elshani.
Gjatë ditës në vizitë në këtë vend ishte edhe zëvendësministri i Administrimit të Pushtetit Lokal, Arbër Vokrri. Ai tha se nga policia është njoftuar për gjendjen, e po ashtu ka pranuar edhe disa kërkesa nga ta.
Të kohëpaskohshme ishin edhe patrullimet e njësiteve të KFOR-it dhe EULEX-it.