Shefi i Grupit Parlamentare të PDK-së, Abelard Tahiri ka thënë se është obligim i kryetarit të Kuvendit, Glauk Konjufca, që të finalizohet themelimi i Komisionit Hetimor për rezervat shtetërore.
Ai tha se ky komision është themeluar dhe vetëm duhet të votohen emrat e propozuar nga Grupet Parlamentare.
“Ky Komision tashmë është i themeluar, nuk ka nevojë as për votim as për formalizim për një Komision të tillë dhe rrjedhimisht unë i kam dërguar emrat edhe në seancë dhe nuk ka nevojë as në seancë që të diskutojmë. Thjeshtë ky vendim duhet që të formalizohet nga kryetari i Kuvendit me emrat që i kemi dërguar si Grupe Parlamentare dhe të vazhdojë puna. A votohet apo nuk votohet raporti do të jetë çështje tjetër. Prandaj themelimi i këtij komisioni është obligim i cili duhet që ta përmbyllë kryetari i Kuvendit që është iniciuar nga 40 deputet, ”, ka deklaruar ai në Kuvend.
Tahiri, është shprehur se janë të gatshëm që të mos marrim fare mëditje nga puna në komisionin hetimor parlamentar për rezervën shtetërore, vetëm që ky komision të themelohet.
Tahiri ka thënë se po ashtu duhet të hetohet rrjedha e mbledhjes online e Qeverisë së Kosovës më 26 dhjetor 2022 për rezervat shtetërore.
“Është shumë e rëndësishme me pas Komision Hetimor Parlamentar. Qeveria ka mbajtur mbledhje online, dhe neve na duhet t’i shohim argumentet që janë dhënë, sepse edhe baza ligjore është gabim. Është e rëndësishme të shihet rrjedha e mbledhjes online e Qeverisë, e ku kanë marrë vendim kaq të rëndësishëm. Për një vendim kaq të rëndësishëm, mos me pas kurajo me mbajt mbledhje, për këtë duhet hetim parlamentar”, ka shtuar Tahiri.