Që nga koha kur ka filluar punën me qeverinë “Kurti 2”, kryeministri i Kosovës, ka realizuar disa vizita jashtë vendit, por ende nuk e ka zhvilluar një të tillë në Shtetet e Bashkuara të Amerikës.
Nga Qeveria e Kosovës, ndonëse nuk potencuan nëse ka një ftesë zyrtare ose jo, thonë se Albin Kurti do ta zhvilloj vizitën e tij në SHBA, gjatë muajt maj.
“Kryeministri Kurti pritet që vizitën e tij të parë në Shteteve e Bashkuara të Amerikës ta fillojë në maj të këtij viti. Gjatë saj do të takohet me administratën Biden dhe përfaqësues të diasporës tonë në ShBA. Nuk mendoj se mund të ketë vizitë e takime zyrtare pa pasur në konfirmim për gatishmëri, interesim dhe vullnet nga pala mikpritëse që ato të mbahen. Për detajet e vizitës dhe takimet do të njoftoheni me kohë e paraprakisht”, thuhet në përgjigjen e Qeverisë.
Mosrealizimin e një vizite të kryeministrit në SHBA, njohësi i çështjeve politike Artan Muhaxhiri e sheh si një bllokadë në raportet mes Kurtit dhe Administratës së presidentit Biden.
“Sa i përket kryeministrit Kurti, nuk është aspak e mirë që ai deri më tani nuk e ka vizituar Shtetet e Bashkuara të Amerikës. Sepse kjo është një indikacion që Shtetet e Bashkuara të Amerikës nuk po e konsiderojnë si një partner, siç i kanë konsideruar kryeministrat tjerë… Për këtë arsye ekziston një ngërç, ekziston një bllokadë në mes të raporteve mes kryeministrit Kurti dhe Administratës amerikane. Dhe kjo po reflektohet edhe në pamundësinë që kryeministri Kurti ta vizitojë në mënyrë zyrtare Washingtonin”, tha ai.
E sipas analistit Gazmir Raci, njëri nga faktorët që ka ndikuar në mosrealizimin e kësaj vizite, mund të ndërlidhet me mungesën e lobimit.
“Për mosrealizimin e kësaj vizite të paralajmëruar gjatë nga ana e kryeministrit mund të ken ndikuar disa faktor. Për mendimin tim faktori kryesor është mungesa e kompanive lotuese në Amerikë. E dimë që politika e jashtme amerikane dhe vendimmarrja në politikën amerikane varet kryesisht edhe nga grupet e lotimit”, tha Raci.
Përderisa SHBA-në e ka në agjendën e muajit maj, këtë javë Kurti po qëndron në një vizitë zyrtare në Norvegji.
Raporti i Gazetarit Valmir Gallopeni.
