Gjykata Themelore në Prishtinë ka vendosur masën e paraburgimit nga 30 ditë për dy punëtorët e çerdhes ”Gëzimi ynë” të cilat dyshohet se rrahën 3-vjeçarin në Fushë-Kosovë.
Lajmin për teve1.info e ka konfirmuar zëdhënësja e prokurorisë, Mirlinda Gashi.
“I është vendosur masa e paraburgimit për dy punëtorët për 30 ditë”, ka deklaruar ajo.
Ndryshe, Ministria e Arsimit, Shkencës dhe Teknologjisë njofton se Inspektorati i Arsimit ka nxjerrë vendim me të cilin obligon Drejtorinë Komunale të Arsimit në Fushë Kosovë për suspendimin nga puna të dy edukatoreve dhe kuzhinieres së çerdhes “Gëzimi ynë” të kësaj komune.
Kështu ka thënë, zëdhënësja e MASHT, Edona Kutleshi-Maliqaj për teve1.info
“Inspektorati i Arsimit ka nxjerrë vendim me të cilin obligon Drejtorinë Komunale të Arsimit në Fushë Kosovë që menjëherë të suspendojë nga marrëdhënia e punës 3 punëtorët e Institucionit parashkollor “Gëzimi Ynë”, N.M, SH.I dhe N.H derisa të vendosin organet e hetuesisë/drejtësisë”, tha ajo.
Kutleshi-Maliqaj tutje theksoi se përmes vendimit, Inspektorati i Arsimit obligon Drejtorinë Komunale të Arsimit në Fushë Kosovë qe të merren masa edhe ndaj drejtoreshes së çerdhes e cila nuk ka vepruar me kohë për rastin.
“Po ashtu, përmes këtij vendimi, Inspektorati i Arsimit obligon Drejtorinë Komunale të Arsimit në Fushë Kosovë që të merr masa disiplinore ndaj drejtoreshës së Institucionit parashkollor “Gëzimi ynë”, në Fushë Kosovë, e cila nuk ka vepruar me kohë për rastin në fjalë”, tha ajo.
