Kosova ka fituar të drejtën për organizimin e Lojërave Mesdhetare për vitin 2030.
Për këtë vendim ka reaguar Komiteti Olimpik i Serbisë tha se ky vendim ishte skandaloz, derisa përmendën edhe praninë e kryeministrit Kurti kur u mbajt votimi.
Madje në reagim të tyre thuhet se Komiteti Olimpik i Serbisë i dënon ashpër këtë lloj ndërhyrje të politikës në sport.
“Në Kuvendin e sotëm pa lajmërim paraprak për delegatët është paraqitur dhe ka folur Albin Kurti. Komiteti Olimpik i Serbisë ka reaguar ashpër dhe insistoi që vendimi për pritjen e MI 2030 të merret pas Lojërave Olimpike të vitit 2024, gjë që është praktikë në këto raste. Kryesia e ICMI-së refuzoi ta votojë këtë propozim të Serbisë dhe kështu delegatët i vuri para një fakti të kryer. Pavarësisht se kandidatët e tjerë u tërhoqën dhe përkundër presionit të madh për të marrë vendimin unanimisht, organizimi i Lojërave Mesdhetare u dha, por me kundërshtim të fortë nga përfaqësuesit e Komitetit Olimpik të Serbisë, me 8 vota kundër. Komiteti Olimpik i Serbisë dënon ashpër këtë lloj ndërhyrje të politikës në sport”, thuhej mes tjerash në reagimin e Komitetit Olimpik të Serbisë.
Kësaj deklaratë i ka reaguar shefi i stafit të Presidencës, Blerim Vela, i cili ka shkruar : “Mendoj se ka më shumë kuptim të thuhet: “Kur sportistët serbë garojnë në Lojërat Mesdhetare në Kosovë”. Në vend të thirrjes shoviniste për luftë të lyer me sprej nëpër Serbi!”, ka shkruar Vela në X, duke shpërndarë reagimin e Komitetit serb.
I guess it makes more sense to say:
“When Serbian athletes compete in the Mediterranean Games in Kosovo”
Rather than the chauvinist cry of war spray painted across Serbia! https://t.co/quiBc7tRg7
— Blerim Vela (@Blerim_Vela) September 9, 2023
Kryeministri, Albin Kurti e ka cilësuar arritje të jashtëzakonshme që Kosova ka fituar të drejtën për organizimin e Lojërave Mesdhetare për vitin 2030.
Kurti në Facebook gjithashtu uroi të gjithë për këtë arritje.
“Kosova nikoqire e Lojërave Mesdhetare Prishtina 2030. Arritje e jashtëzakonshme. Urime të gjithëve!”, shkroi Kurti.
Ndryshe, për këtë lajm ka njoftuar kryetari i Prishtinës, Përparim Rama.
“Lajm historik! Prishtina shpallet Organizatore e Lojërave Mesdhetare 2030! Lojërat Mesdhetare – Prishtina 2030 janë arritje e madhe për Prishtinën, fitore e madhe për Kosovën dhe Festival i madh sportiv për mbarë kombin shqiptar”, ka shkruar Rama.