Kryeministri, Albin Kurti ka thënë se Kosova është e rrezikuar nga sulmet kibernetike, të cilat sipas tij, mund të vijnë nga aleatët e Rusisë.
Kurti këtë deklaratë e tha në fjalimin e tij të mbajtur në asamblenë “Open Government Partnership”, ku shtoi se në dritën e sulmeve kibernetike digjitalizimi bëhet edhe më i rëndësishëm.
“Është kënaqësi që të jem ne Estoni. Estonia është një storie suksesi e digjitalizimit. Ajo ua ka lehtësuar jetën qytetarëve të saj përmes digjitalizimit. Në dritën e sulmeve kibernetike, digjitalizimi bëhet edhe më i rëndësishëm. Me internetin që shtrihet në gjithë territorin e Kosovës, qytetarët tanë kane mundësi në marketin ndërkombëtar”.
Ai shtoi se Kosova është e hapur që të mësojë nga aleatët e saj për një demokraci sa më të fortë digjitale.
“Kështu mund ta përmirësojmë efikasitetin e shëndetësisë, gjyqësorit dhe ta rrisim produktivitetin e gjithë ekonomisë. Mirëpo çdo e mirë, ka edhe kërcënimet e saj. Në Kosovë, aleatët e Rusisë kanë tendenca të bëjnë sulme kibernetike. Jemi të hapur të mësojmë nga ju për një demokraci sa më të fortë digjitale”, tha ai.
Ndryshe, Kurti së bashku me ministrin e Administrimit të Pushtetit Lokal, Elbert Krasniqin, kanë udhëtuar për në Tallinn të Estonisë.
Gjatë ditës, kryeministri Kurti, po ashtu do të zhvillojë një takim dypalësh me kryeministren e Estonisë, Kaja Kallas, krahas takimeve tjera.
