Ministri për Komunitete dhe Kthim në Qeverinë e Kosovës, Nenad Rashiq tha se partisë së presidentit serb në Beograd, Aleksandar Vuçiq nuk i konvenojnë mbajtja e zgjedhjeve në veri të Kosovës.
Ai në emisionin “Info Nata” në Tëvë 1 tha se mbajtja e tyre mund t’i bëjë dëm politikës së Beogradit.
“ Pas atyre shumë ‘sakrificave’ që i ka bërë regjimi i Beogradit sa i përket tërheqjes nga institucionet dhe tani kur është përgatitja për zgjedhjet parlamentare në Serbi të cilat do të ndodhin diku deri në fund të vitit. Vuciqit në këtë moment hiç nuk i konvenon që pas shumë “sakrificve” që i kanë bërë serbët e Kosovës që t’i pranon prapë zgjedhjet ku do të dilshin vetëm për kryetarë të komunave, ku e din që këshilltarët lokal mbesin ata që i kemi. Pra, duhet që të dini ato elemente që partisë së Vuçiqit në Beograd nuk i konvenon aspak që të këtë zgjedhje të reja në veri sepse konsiderojë që është një sakrificë në anën tjetër ose një dëm që mund t’i bëhet politikës së Beogradit ashtu që në këto rrethana që kemi sot”, ka thënë ai.
Ministri i Administrimit dhe Pushtetit Lokal, Elbert Krasniqi, ka njoftuar se ka përfunduar hartimi i udhëzimit administrativ, i cili u mundëson qytetarëve që përmes peticionit t’ia kërkojnë largimin nga detyra, kryetarëve të komunave.
Në dokument thuhet se secili qytetar apo grup qytetarësh me të drejtë vote në komunën përkatëse ka të drejtë të ndërmarrë iniciativën për largimin e kryetarit të komunës.
Qeveria e Kosovës në marrëveshjen e Bratislavës ka shprehur përkushtimin për organizim të zgjedhjeve të reja në veri të vendit, por ka insistuar se duhet të shikohet baza ligjore.
Për Qeverinë, shkuarja në zgjedhje përmes kërkesës së qytetarëve me anë të peticionit, është mënyra ligjore dhe më e mira.
BE dhe SHBA në anën tjetër kanë ripërsëritur thirrjet për zgjedhje të reja, si kusht i heqjes së disa masave të vendosura ndaj Kosovës, të cilën e bëjnë përgjegjëse për situatën e krijuar në veri të vendit në maj dhe qershor.
Instituti Demokratik i Kosovës, të mërkurën ka thënë se udhëzimit administrativ tejkalon ligjet dhe si i tillë është i pamjaftueshëm për të mundësuar largimin e kryetarëve nga posti.
Sa i përket zgjedhjeve në katër komunat veriore, KDI por edhe njohës të tjerë të fushës kanë thënë se mënyra më e mirë për shkuarjen në zgjedhje është përmes dorëheqjes së kryetarëve.
