Instituti Demokratik i Kosovës, ka kritikuar udhëzimin administrativ të hartuar nga Qeveria e Kosovës, për marrjen e mandatit të kryetarëve të komunave.
KDI ka vlerësuar se hartimi i udhëzimit është përcjell me jo transparencë.
“Drafti i përgatitur nga MAPL-ja ka tejkaluar përcaktimet ligjore të ligjit për vetëqeverisjen lokale. Në njërën anë, MAPL-ja ka përcaktuar procedura, afate dhe obligime në kuadër të iniciativës që shkojnë përtej ligjit, e në anën tjetër, nuk ka adresuar paqartësitë në zbatimin e dispozitave në fuqi”, thuhet nga KDI.
Sipas KDI-së, afati i përcaktimit prej 30 ditësh për mbledhjen e nënshkrimeve nga qytetarët është caktuar kundërligjshëm.
“Specifikisht, udhëzimi kundërligjshëm përcakton një afat prej 30 ditësh për mbledhjen e nënshkrimeve, gjë që ua kufizon qytetarëve vullnetin për ushtrimin e një të drejte ligjore, si dhe paradoksalisht përcakton afat shtesë për plotësimin e kërkesës me nënshkrime të reja, nëse nuk arrihet kriteri prej 20% të votuesve të regjistruar. Në anën tjetër, udhëzimi nuk ka precizuar se cila listë e votuesve do të merret për bazë në inicimin e kërkesës dhe zhvillimin e procesit të votimit. Prandaj, në këto rrethana, KDI rithekson që udhëzimi administrativ, përveç se në kundërshtim me ligjin, është i pamjaftueshëm për të mundësuar largimin e kryetarëve të komunave. Për zhvillimin adekuat të këtij procesi, është i domosdoshëm miratimi i legjislacionit përkatës sekondar nga Komisioni Qendror i Zgjedhjeve”, thuhet në komunikatë.
KDI ka vlerësuar se dorëheqja e kryetarëve aktualë në komunat veriore është zgjidhja më efikase.
Presidentja e Kosovës, Vjosa Osmani, ka thënë se baza ligjore do të jetë gati më 1 shtator./teve1.info/
