Presidentja e Kosovës, Vjosa Osmani, gjatë konferencës me presidentin e Shqipërisë, Bajram Begaj, ka potencuar se nuk është situata në veri ajo që ka acaruar dialogun Kosovë – Serbi, por është vetë Serbia.
Osmani, tha se Serbia është ajo që gjithnjë acaron situatën në rajon, përmes sulmeve ndaj Kosovës.
“Nuk është situata në veri ajo që ka acaruar dialogun Kosovë – Serbi, është Serbia ajo që gjithnjë acaron situatën në rajonin tonë, nëpërmjet sulmeve të njëpasnjëshme ndaj Kosovës. Nuk ka javë që kalon që dikush nga Serbia nuk gjuan me armë policët e Kosovës që janë në territorin e Republikës së Kosovës. Duke zbatuar në përpikëri planin që Putini e pat zbatuar në vitin 2014 kundër Ukrainës”, tha presidentja Osmani, përcjell teve1.info
Sipas presidentes, presidenti serb, Aleksandër Vuçiq, dhe shteti i Serbisë po synojnë ta destabilizojnë gjithë Ballkanin Perëndimor.
“Vuçiqi dhe Serbia po synojnë ta destabilizojnë gjithë Ballkanin Perëndimor e nëpërmjet destabilimit të rajonit tonë ta atakojnë vlerat dhe sistemin e vlerave mbi të cilin qëndron Bashkimi Evropian dhe NATO. Pra duhet ta shohim gjithë pikturën, e cila është shumë më e madhe sesa zhvillim në një vend apo në një rajon. Serbia vazhdimisht fut armatim në Kosovë ilegalisht, Serbia vazhdimisht trajnon pjesë të strukturave kriminale ilegale në ushtrinë serbe në mënyrë që ata pastaj të shkaktojnë probleme përmes armëve që i kanë sjellë ilegalisht në veri të Kosovës. Vazhdimisht i terrorizon, i sulmon qytetarët serbë që jetojnë në veri. Pra kjo është një sfidë për të gjithë rajonin tonë”, tha presidentja Osmani.
“Çdo diskutim i momentit që mund të ketë involvuar mospajtime tashmë është tejkaluar. Qëllimi i Kosovës dhe i Shqipërisë është i përbashkët, Kosova është sovrane është e pavarur”, tha tutje presidentja./teve1.info/
