Telefonata të tilla me familjarët e të zhdukurve me dhunë i ka të përditshme.
Por, me një numër të vogël të tyre, nuk po arrijnë të dakordohen në një pikë.
Pasi këta të fundit edhe pas 24 vjetëve të përfundimit të luftës, po hezitojnë t’i japin mostrat e gjakut për identifikimin e mbetjeve mortore.
Kushtrim Gara nga Komisioni Qeveritar për Personat e Zhdukur thotë se numri i familjeve që po hezitojnë në këtë pikë, është i vogël.
“Si Komision Qeveritar kemi mirëkuptimin e plot edhe ndaj kërkesave dhe ndaj shqetësimin e familjarëve duke e pas parasysh 24 vjet jetë me dhimbje dhe ankthin e pritjes. Në rastet specifike, edhe pse numri është shumë i vogël në raport me numrin e përgjithshëm të personave që janë të evidentuar të zhdukur, po flasim diku për 13 raste të personave të zhdukur, familjet e të cilave kanë hezituar ofrimin e bashkëpunimin e ofrimin të mostrave të gjakut dhe 70 raste ne të cilat kemi mostra të pjesshme të gjakut”, tha ai.
Gara bën apel tek këto familje të bashkëpunojnë edhe në këtë pikë derisa ka treguar arsyet e hezitimit të tyre.
Ndërsa falënderim për familjet, familjarët e të cilët u identifikuan në vitet e para të pasluftës.
“Janë rastet e viktimave që në kohën e pasluftës janë identifikuar me metodën tradicionale, jo me atë shkencore. Në asnjë rrethanë kjo nuk do të thotë që viktima që janë identifikuar paslufte janë gabim, kjo përjashtohet si mundësi. Në rastet specifike që po kontaktohen nga organet, po hasim në mirëkuptim dhe mbështetje nga këto familje që është për t’u vlerësuar dhe falënderuar”, tha ai.
Se ka raste kur familjarët e të zhdukurve kanë hezituar dhënien e mostrave të gjakut për identifikimin e mbetjeve mortore, e thonë edhe në Këshillin Koordinues të Familjareve të të Zhdukurve.
“Kemi një rast në Mitrovicë, H.H, i cili i ka katër anëtar të zhdukur i cili nuk ka pranuar t’i jap mostrat e gjakut dhe nuk pranon t’i jap duke menduar se djemtë i ka të gjallë. Por, ka edhe matrapaz që i keqinformojnë në këto rast që (familjarët) i kanë të gjallë në burgjet e Serbisë”, tha Ahmet Grajçevci, Këshilli Koordinues i Asociacioneve të Familjareve të të Zhdukurve.
Apel për këto familje, ka edhe edhe Ahmet Grajçevci nga ky këshill.
“Është mirë që t’i japin ato (mostrat e gjakut) sepse se pari e lehtësojnë veten, po edhe neve na lehtëson dhe shoqërinë në përgjithësi, sepse jemi të interesuar që edhe njeriun e fundit të zhdukur ta gjejmë”, shtoi ai.
Ndryshe, 30 gushti në Kosovë ka shënuar Ditën Ndërkombëtare të Personave të Zhdukur me dhunë gjatë luftës në Kosovë.
