Sindikatën e Bashkuar të Arsimit, Shkencës dhe Kulturës e Kosovës (SBASHK) e ka vlerësuar skandaloz vendimin e MASHTI-t për tekstet shkollore.
Përmes një njoftimi, nga SBASHK-u kanë bërë të ditur se do të mbajmë një takim të hënën e ardhshme me kryetarët e nivelit komunal sindikal dhe të universiteteve, që janë përfaqësues të anëtarësisë, përcjell teve1.info
Siç njofton SBASHK-u, në këtë takim do të bashkëbisedohet për gjendjen aktuale në arsim, për problemet lidhur me fillimin e vitit të ri shkollor, dhe për vendimin siç thuhet “skandaloz të MASHTI-it për tekstet shkollore” e për shumë çështje të tjera.
Takimi pritet të fillojë nga ora 10:00.
Nga sot, të gjithë prindërit që kanë fëmijët në shkollë nga klasa e parë deri në të nëntën, kanë filluar aplikimin për subvencionimin e teksteve shkollore.
Mjetet do të dalin në xhirollogaritë e prindërve nga fillimi i javës së ardhshme.
Sipas njoftimit të ministres së Arsimit, Arbërie Nagavci, 80 euro do të ndahen për nxënësit nga klasa 1 deri në klasën e 5 për blerjen e teksteve dhe materialeve mësimore.
Po ashtu, klasa 6 deri në klasën e 9 të cilët tashmë i kanë të siguruara tekstet mësimore, do të ndahen 30 euro si mbështetje për materiale të tjera shkollore. /Teve1.info/
