Ministrja e Arsimit, Arbërie Nagavci, mbrëmë ka njoftuar se duke filluar nga sot (e premte) të gjithë prindërit që kanë fëmijët në shkollë nga klasa e parë deri në të nëntën, mund të aplikojnë për subvencionimin e teksteve shkollore.
Për këtë ministrja tha se mjetet do të dalin në xhirollogaritë e prindërve nga fillimi i javës së ardhshme.
“Do të ndahen 80 euro për nxënësit nga klasa 1 deri në klasën e 5 për blerjen e teksteve dhe materialeve mësimore. Po ashtu, për herë të parë për nxënësit nga klasa 6 deri në klasën e 9 të cilët tashmë i kanë të siguruara tekstet mësimore, do të ndahen 30 euro si mbështetje për materiale të tjera shkollore”, tha ajo.
Kurse sa i përket mënyrës së aplikimit Nagavci tha se instruksionet do të publikohen gjatë ditës së sotme.
“Çmimet e teksteve do të publikohen nga shtëpitë botuese ku lista e teksteve të përzgjedhura nga aktivet profesionale tashmë është e gatshme andaj, ftojmë të gjithë prindërit të konsultohen me mësimdhënësit se cilat tekste duhet t’i blejnë”, tha Nagavci./teve1.info./
Ministria e Arsimit do t’i ndajë nga 80 euro për blerjen e librave