Darka jo-formale që u mbajt të hënën në Athinë, prodhoi një deklaratë prej tetë pikave, përmes së cilës u rikonfirmua mbështetja për Ukrainën dhe dënimi i agresionit rus, e po ashtu edhe për nevojën që vendet e Ballkanit të bëhen sa më parë pjesë e Bashkimit Evropian.
Kryeministri i Kosovës, Albin Kurti, ka dhënë detaje për qëndrimin që ai ka dhënë në darkën që u mbajt në Athinë.
“Në darkën e përbashkët që patëm unë theksova se anëtarësimi i Kosovës në Bashkimin Evropian nuk ka alternativë. Që të gjitha shtetet që aspirojnë anëtarësimin në BE duhet ta zbatojnë demokracinë, sundimin e ligjit, respektimin e të drejtave të njeriut dhe fqinjësinë e mirë. Dhe se për fqinjësi të mirë, demokratike e evropiane është e rëndësishme njohja reciproke de-jure e de-fakto si dhe të drejtat e pakicave në mënyrë simetrike e sipas konventave evropiane”, ka thënë Kurti.
Por, Politikani i CDU-së gjermane, Kolë Gjoka thotë se takimi në Greqi nuk ka prodhuar ndonjë rezultat që do ta përafronte Ballkanin me BE-në.
“Në deklaratën e tyre pas kësaj darke informale, nuk kishte ose nuk shikoj unë asnjë gjë që ka lidhje me përshpejtimin e rrugës tonë drejtë Bashkimit Evropian. Sinqerisht që nuk do të ngelet kurrë çështja e Ballkanit Perëndimor, e integrimit të Ballkanit Perëndimor në Bashkimin Evropian do të ngelet çështje greke”, deklaroi Gjoka.
Nisma kryesore, që synon përafrimin e Ballkanit me Bashkimin Evropian është “Procesi i Berlinit”, i cili këtë vit do të mbahet për herë të parë në Tiranë, në muajin tetor.
Por Gjoka thotë se nuk pret të ndodh ndonjë zhvillim i madh në Procesin e Berlinit këtë vit, përderisa u bënë thirrje vendeve anëtare që të mos vendosin pengesa për aspiruesit e BE-së.
“Unë nuk pres ndonjë gjë të madhe dhe nuk e shoh që ka ndonjë lidhje shumë të madhe me Ukrainën, kryesorja është që ne të bëjmë detyrat e shtëpisë dhe vendet si Greqia që janë vende anëtare të Bashkimit Evropian, të mos mundohen, që të mos mundohen, e ritheksoj këtë që të na vejnë gurë në rrugën tonë drejtë Bashkimit Evropian, sepse këto gurë Samiti i Berlinit nuk i percepton”, shtoi ai.
Kryeministri shqiptar Edi Rama javë më parë ka pasur një turne në vendet e Ballkanit në kuadër të përgatitjeve për procesin e Berlinit, ku këtë vit do të jetë nikoqir i këtij organizimi.
