Anëtarja e Lidhjes Demokratike të Kosovës, Shqipe Pantina ka hedhur në pikëpyetje nëse prindërit janë të përgjegjshëm mjaftueshëm që mos t’i keqpërdorin mjetet që rimbursohen nga Qeveria për blerjen e teksteve shkollore për fëmijët.
Pantina është shprehur e bindur se në Kosovë ka prindër të papërgjegjshëm, sa t’i blejnë fëmijëve gjëra të tjera, e jo libra.
“A kanë të gjithë prindërit xhirollogari të gatshme ku mund t’i pranojnë ato?! A jemi të sigurt që të gjithë prindërit janë të përgjegjshëm mjaftueshëm dhe me ato para do të blejnë libra e nuk do t’i keqpërdorin?! A na siguron Qeveria një gjë të tillë?! Çka do ndodh me ato raste?! Por çka ndodh me rastet kur fëmijët pa fajin e tyre, për shkak të prindërve të papërgjegjshëm, unë dua të besoj se nuk ka të tillë në Kosovë, megjithatë jam e mëse e bindur se ka. Sepse ne kemi prind që edhe kanë vu dorë mbi fëmijët e tyre, vrasin nënat e fëmijëve të tyre, e mos të flasim se ata një ditë nuk do t’i keqpërdorin këto mjete, dhe në vend që t’u blejnë libra fëmijëve, do blejnë diçka tjetër. Çka do të ndodh me këta fëmijë?”, deklaroi ajo në “Ditari” në Tëvë 1.
Sipas saj, kjo e dëshmon se Qeveria “nuk e ka idenë as më të vogël se si duhet ta rregullojë çështjen e arsimit”.
Ministrja e Arsimit, Arbërie Nagavci ka bërë të ditur se janë duke shqyrtuar mundësinë për transferimin e mjeteve për sigurimin e teksteve shkollore te prindërit, pasi “çmimet e ofruara nga shtëpitë botuese janë të papërballueshme për buxhetin e MASHTI-t”.
Vendimi përfundimtar për librat pritet të publikohet brenda dy ditësh. /Teve1.info/
