Zëdhënësi i BE-së, Peter Stano ka ripërsëritur se Bashkimi Evropian si ndërmjetësues në dialogun Kosovë – Serbi, është i paanshëm dhe ndihmon të dyja palët për të arritur kompromiset e nevojshme në mënyrë që marrëdhëniet në mes të dyja shteteve të normalizohen.
Duke komentuar letrën që kanë pranuar nga 56 parlamentarë nga Europa dhe SHBA me kërkesën që të sillen në mënyrë të barabartë si ndaj Kosovës ashtu edhe ndaj Serbisë, ai deklaroi se BE-ja i merr vendimet unanime.
Teksa për masat e vendosura ndaj Kosovës, Stano deklaroi se BE-ja do i vendos masa edhe Serbisë, nëse shtetet anëtare vlerësojnë se ajo nuk po bën asgjë për ta përshkallëzuar situatën, përcjell teve1.info
“BE, institucionet dhe shtetet anëtare, sepse çfarëdo ne bëjmë është në sinkronizim dhe në konsultim dhe koordinim me shtetet anëtare, gjithashtu edhe me partnerët ndërkombëtarë, në këtë kontekst kryesisht Shtetet e Bashkuara të Amerikës. Dhe pastaj nëse anëtarët vendosin, ne do të prezantojmë masat e nevojshme ndaj Serbisë, nëse 27 vendet anëtare vendosin që në situatën aktuale të këtyre krizave të fundit, Serbia nuk po bën asgjë për të depërshkallëzuar situatën”, tha ai në një konferencë për media.
Tutje, ai theksoi se masat e fundit ndaj Qeverisë së Kosovës janë vendosur për shkak të “pafatësisë së tyre” për të marrë hapa për qetësuar situatën.
Stano shtoi se qasja e BE-së ndaj të dyja palëve është e balancuar.
Masat e BE-së ndaj Kosovës kanë hyrë në fuqi më 28 qershor, derisa përfshijnë pezullimin e programit të fondeve për Kosovën, pezullimin e mbështetjes së vazhdueshme për prokurimin dhe nënshkrimin e kontratave, pezullimin e pjesëmarrjes në ngjarjet e nivelit të lartë, pezullimin e vizitave dypalëshe, si dhe propozimin e dorëzuar nga Kosova për kornizën investuese për Ballkanin Perëndimor që nuk do të procedohet në këtë moment.
BE-ja ka kërkuar përkushtim më të madh nga pala kosovare për zbatimin e kërkesave për shtensionimin e plotë të situatës në veri, ku përfshihet edhe shpallja e zgjedhjeve në veri. /Teve1.info/
