Kryetari i AAK-së, Ramush Haradinaj, ka deklaruar se cenimi i sigurisë së qytetarëve në Kosovë ditëve të fundit dhe siç ka thënë ai, neglizhenca e organeve të rendit për t’i parandaluar ato, po bëhen me qëllim për të tërhequr vëmendjen e qytetarëve nga skandalet e Qeverisë, raporton teve1.info
Këtë reagim Haradinaj e bëri pas ngjarjes së mbrëmshme në Runik të Skenderajt, ku u vra një qytetar dhe u plagosën tre të tjerë në një lokal të natës.
Përmes një shkrimi në Facebook, Haradinaj ka thënë se shfaqja e kriminelëve me maska, siç ndodhi mbrëmë në Skenderaj, e shfaqë pafuqinë e Qeverisë për t’i ndalur ato dhe siç ka thënë Haradinaj, guximin e grupeve kriminale për të vepruar.
Haradinaj ka shkruar se mocioni është zgjidhja.
“Vrasjet e ditëve të fundit, përfshirë edhe vrasjen e një shtetasi të huaj, janë treguesi më i mirë për pasigurinë dhe kërcënimin që ju kanoset qytetarëve si në rrugë, ashtu dhe në ambiente publike, lokale hoteliere e gjetiu.
Mungesa e vizionit dhe përkushtimit të qeverisë e MPB, ngritë dyshime të shumta se ky nivel i lartë i cenimit të sigurisë publike dhe neglizhenca institucionale për të parandaluar këto lloje të krimeve nga të cilat çdo ditë është duke u tronditur vendi, ka për qëllim zhvendosjen e vëmendjes së opinionit nga skandalet dhe aferat e shumta korruptive të qeverisë, ku së fundmi u mësua edhe për planifikim të kontrabandës ndërkombëtare me armë nga ana e sekserëve të afërt me qeverinë.
Shfaqja e krimineleve me maska siç ishte rasti i mbrëmshëm në komunën e Skenderajt ku mbeti i vrarë një qytetar dhe u plagosën tre të tjerë, nxjerr në pah pafuqinë e qeverisë si dhe guximin e grupeve kriminale për të vepruar.
Objektivisht qytetari ka mbetur i pa mbrojtur, i pa përkujdesur nga kjo qeveri e cila ka mungesë të madhe profesionale për të trajtuar çështje komplekse siç është siguria.
Kjo qeveri do të mbahet përgjegjëse për përkeqësimin e gjendjes së sigurisë në vend. Mocioni është zgjidhja”, ka shkruar Haradinaj ndër të tjera.