Dogana e Kosovës, gjatë kontrolleve rutinore dhe të bazuara në analizën e rrezikut ndaj udhëtarëve në Aeroportin Ndërkombëtar të Prishtinës, ka ndaluar për kontroll një udhëtar i cili po hynte në territorin e Republikës së Kosovës.
Gjatë kontrollit, pas kalimit të bagazhit nëpër skaner dhe bazuar në dyshimet e zyrtarit doganor, është kryer ekzaminimi fizik i bagazhit të udhëtarit.
Dogana ka bërë të ditur se gjatë ekzaminimit janë gjetur 8 (tetë) telefona të mençur të markës iPhone 18, të cilët nuk ishin deklaruar pranë autoriteteve doganore. Vlera e përgjithshme e këtyre mallrave ka qenë rreth 15,000 euro.
“Mallrat janë ndaluar nga Dogana e Kosovës dhe rasti është proceduar për vazhdimin e procedurave doganore, përfshirë përcaktimin e statusit doganor dhe detyrimeve përkatëse, në përputhje me legjislacionin në fuqi.Sipas Kodit Nr. 08/L-247 Doganor dhe të Akcizave, mallrat e bartura nga udhëtarët duhet të deklarohen kur janë mbi kufijtë e lejuar ose kur kanë natyrë tregtare. Përfitimi nga lirimi për bagazhin personal vlen vetëm për importe që nuk kanë natyrë tregtare; ndërsa natyra dhe sasia e mallrave janë ndër elementet që merren parasysh në përcaktimin e karakterit jo-tregtar të importit. Dogana e Kosovës vazhdon kontrollet e rregullta në pikat e kalimit kufitar, me qëllim të parandalimit të shkeljeve doganore, mbrojtjes së interesave financiare të Republikës së Kosovës dhe sigurimit të zbatimit të njëtrajtshëm të legjislacionit doganor”, thuhet në komunikatë./teve1.info/
