Shefja e Grupit Parlamentar të Lëvizjes Vetëvendosje, Mimoza Kusari-Lila, ka dorëzuar kallëzim penal ndaj ish-nënkryetarit të Kuvendit, ish-deputetit dhe zyrtarit të Listës Serbe, Slavko Simiq.
Kusari-Lila për publikimin e audio-incizimeve e akuzon Simiqin, si dhe thotë se ato janë akte penale dhe aktivitete dezinformuese nga ana tjetër.
“Të njëjtat tani janë pjesë e kallzimit penal dorëzuar Prokurorisë së Shtetit me 1 Gusht, 2023. Përveç jashtëligjshmërisë së inçizimit, pastaj përcjelljes për përfitim material dhe personal, partiak, me qëllim denigrimin e tjetrit për shkak të detyrës që mban, sekuencat kohore të materialit janë ndryshuar e materiali është manipuluar”, ka shkruar ajo në Facebook.
Tutje, ajo thotë se Simiqit nuk i ka mjaftuar incizimi, por ka bërë edhe deformim të përmbajtjes.
“Gjuha me qëllim nxitjen e urrejtjes, mosdurimit dhe denigrimit të tjetrit e përdorur gjatë komentimit të materialit, ka nxitur kërcënimet ndaj meje nga persona të caktuar. Edhe ato janë paraqitur tek autoritetet relevante”, është shprehur ajo.
Kusari-Lila thotë se lidhur me publikimin e audio-incizimeve janë publikuar dhjetëra lajme të rreme, ku përveç individëve ajo akuzon edhe Partin Demokratike të Kosovës (PDK).
“Në këtë periudhë kohore janë publikuar dhjetëra lajme të rreme, të verifikuara nga monitoruesit. Burimi i tyre përveç nga individë është edhe nga një parti politike parlamentare, PDK. Kjo është një fushatë e sulmit ndaj meje dhe rrjedhimisht ndaj detyrës që unë mbaj, ndaj grupimit politik e institucional që unë i përkas”, shkruan deputetja.
Mes tjerash ajo ka shkruar se për pjesëtarin e Listën Serbe, për porositësit e urdhëruesit e tij dhe për shpërndarësit e nxitësit e dhunës dhe urrejtjes në publik do të vijojnë denoncimet.
“Të njëjtët po synojnë të vijojnë me fushatat e tyre. Pavarësisht si duken fytyrat dhe emrat, le ta themi qartë cila është adresa e kësaj fushate: Serbia, regjimi i Vuçiqit dhe bandat e zgjatimet e tyre në Kosovë”, shtoi ajo./teve1.info/
